O presidente
da Xunta, Núñez Feijóo, destacou hoxe a aprobación do Catálogo das Paisaxes
de Galicia, que definiu como “unha ferramenta de ordenación do territorio de
primeiro nivel” que é “o punto de partida para a protección, a xestión e a
planificación da paisaxe galega”.
Logo
de lembrar que este documento pasou por un período de información pública entre
o 12 de febreiro e o 30 de abril, con 80 achegas que se analizaron e incorporaron
ao documento, Feijóo precisou que o texto establece 211 áreas de especial interese
paisaxístico que abranguen máis de 250.000 hectáreas, o que supón delimitar
máis do 8,5% do territorio galego como solo rústico de protección paisaxística.
Atendendo
ás achegas feitas polos cidadáns, amplíanse 11 áreas e incorpóranse a esta
relación catro máis das que contemplaba o borrador: Pego Negro e San Xusto-Río
Lérez na grande área paisaxística Rías Baixas; Foxo Vello-O Canelar, na grande
área Chairas, Fosas e Serras ourensás; e Coto de Codeseda, na grande área
Galicia central.
Así
mesmo, tamén se incluíron no catálogo todos os miradoiros solicitados nas
alegacións que cumprían as condicións de accesibilidade, 28 máis dos recollidos
no borrador. En total en Galicia hai máis de 400 miradoiros con interese
paisaxísticos, dixo.
O
presidente explicou tamén que o texto identifica 258 tipos de paisaxe e
delimita máis de 28.000 unidades de paisaxe, que resultan da combinación de 5
clases de relevo, 13 clases de cuberta de solo e 5 clases de termotipos.
Ademais de recoller o inventario dos valores paisaxísticos presentes en cada
área; e a análise do estado actual da paisaxe e as súas causas.
Este
documento servirá de base para as Directrices de Paisaxe, nas que xa se está a
traballar. O catálogo e as directrices constituirán o Atlas das paisaxes de
Galicia, que dará soporte aos diferentes instrumentos de ordenación territorial
e urbanística.
“Estamos
finalizando todo o percorrido pola paisaxe e estou convencido de que é un bo
traballo”, asegurou o presidente, que agradeceu o esforzo a todas as persoas
que están a colaborar para dar forma definitiva ao Atlas das Paisaxes de
Galicia.