UNIVERSIDADE DA CORUÑA
Carlos Lalín, Premio UDC Deportes
A Universidade da Coruña vén de conceder o VIII Premio UDC Deportes ao
doutor en Ciencias da Actividade Física e do Deporte por esta universidade
Carlos Lalín Novoa. O xurado presidido pola vicerreitora de Estudantes, Participación
e Extensión Universitaria, Margarita Amor, e composto polo director da área de
Deportes, Juan Fernández, o técnico de Deportes, Manuel Moya, a xefa de
Comunicación da UDC, María Ares, e os xornalistas deportivos Paulo Alonso, Juan
Quijano e Javier Torres, decidiron entregar este premio a Lalín en
recoñecemento a súa profesionalidade e afán innovador no mundo do deporte.
Neste sentido, valorouse a súa traxectoria profesional como readaptador
físico-deportivo de lesión no mundo do fútbol. Carlos Lalín, licenciado en
Educación Física e Deporte pola UDC, acadou o grao de Doutor no ano 2014.
Ademais de diversos méritos académicos, desenvolveu unha actividade
investigadora en lesións deportivas, adestramento, prescrición de exercicio
físico e actividade física e saúde. Foi readaptador físico-deportivo do Real
Club Deportivo da Coruña, entre os anos 1998 e 2008 cando pasou a exercer este
mesmo posto no Real Madrid. Foi asistente de Manager do primeiro equipo do
Chelsea e actualmente forma parte do corpo técnico do Manchester United.
O Premio entregarase no transcurso da Gala do Deporte que a UDC celebra o
vindeiro día 1 de decembro, no salón de actos do Campus Industrial de Ferrol,
ás 20:30 horas, e na que se recoñece aos alumnos da UDC que compiten nas distintas
ligas e campionatos universitarios. Departamento de comunicación