CAMPIONATO DE ESPAÑA DE CICLOCROSS
A selección galega, ouro na proba por equipos
A Selección de Galicia conseguiu o título que tanto ansiaba ao adxudicarse
por primeira vez a carreira de remudas por seleccións, a proba coa que
comezaron este venres os Campionatos de España Loterías en Valencia. Comunidade
Valenciana e Euskadi completaron o podio nunha proba rapidísima, xa que os
ciclistas investiron pouco máis de cinco minutos por volta.
O master 30 Andrés Calvete, o elite Mauro González, o cadete Carlos Canal, a
muller Desiree Duarte, o sub23 Samuel González e o junior Iván Feijoo formaron
o sexteto dirixido polos seleccionadores Xosé Anxo Vidal e Guillermo Sande, un
equipo que superou por apenas 2” ao conxunto valenciano e por 6” ao vasco. Nas
nove edicións anteriores desta proba, que se disputa dende o 2008, Galicia
acadara seis medallas, pero nunca lograra subir ao máis alto do podio.
O asturiano Mario Junquera e o vasco Jokin Alberdi, ambos sub23, levaron ás
súas seleccións a liderar a carreira na primeira remuda. A Comunidade
Valenciana e Galicia, con Andrés Calvete, pasaron a 12 e 15 segundos, aínda que
a selección que máis remontou no segundo xiro foi Madrid, co seu elite Carlos
Hernández, que cun tempo de 5:24 (o mesmo que Junquera) poñíase en cabeza,
seguida a pouca distancia dos galegos, con Mauro González, e os asturianos,
aínda que ao inicio do terceiro xiro o cadete ourensán Carlos Canal poñía ao
seu combinado ao fronte da proba.
A metade de carreira, Galicia levaba 5” a Comunidade Valenciana e 14” a
Euskadi, que aos poucos se ían mostrando como as máis fortes. A selección
laranxa, co seu cadete Cabedo distanciouse na cuarta volta en 19” de Madrid e
en 23” de Asturias e Galicia. Esta boa posta de Desirée Duarte ratificou as
opcións dos galegos.
A continuación, as remudas de Mauro González e de Murias puxeron novamente a
galegos e vascos por diante, separados por apenas oito segundos, aínda que a
valenciá Alba Teruel mantivo o tipo, co que a selección anfitrioa só cedía 12”.
Máis emoción imposible, entre as tres seleccións que xa se albiscaban como
máximas candidatas ao podio.
Na última remuda, nin a experiencia do elite Larrinaga, nin o brío do sub23
Orts, autor da volta rápida, puideron co junior Feijoo. O corredor alaricano,
que marcou un tempo de 5 minutos e 28 segundos, desatou a euforia entre a
delegación galega tras entrar triunfal na liña de meta.
“Tiñamos moitas ilusións este ano, xa que sabiamos que tiñamos un equipo moi
forte, aínda que o percorrido podía xogarche unha mala pasada”, comentou
Guillermo Sande, mentres que Feijoo engadía que “para min non era ningunha
responsabilidade, xa que tamén fora o último na remuda de BTT. Sabía que estaba
forte e os meus compañeiros fixeron unha gran carreira”.
Carreiras do sábado
Os Campionatos de España Loterías de Ciclocross celebrarán hoxe a súa
primeira xornada de probas individuais nas que participarán doce corredores da
Selección de Galicia. Javier de la Fuente, medalla de prata o pasado ano, será
o seu representante na carreira Máster-50 (9:30 horas).
Ás 12:00 horas disputaranse todas as carreiras femininas con Carla
Fernández, Andrea García, Noela Saa, Aida González e Antía Martinez nas
cadetes; Sara Trigo nas juniors; e Irene Trabazo e Desirée Duarte nas sub23. Ás
14:30 Andrés Calvete tomara a saída na competición Máster-30 e a última cita do
día será a sub23 masculina con Raúl Fernández e Samuel González. Departamento de comunicación