Galicia cólgase un ouro e unha prata no Campionato de España de Ciclocross
O ciclismo galego viviu outra xornada para o recordo este domingo na
clausura dos Campionatos de España de ciclocross Loterías celebrados en
Valencia. Defendendo as cores do combinado autonómico, o alaricano Iván Feijoo
proclamouse campión de España júnior e o limiao Carlos Canal rematou segundo na
proba cadete.
Os dous corredores do Academia
Postal-Actyon-MMR de Maceda repetiron presenza no podio despois de participar o
venres na proba por remudas que se adxudicou Galicia. A colleita de metais da
selección dirixida por Xose Anxo Vidal e Guillermo Sande complétase coa prata
obtida o sábado por Samuel González na carreira sub23.
Subcampión junior de ciclocross
hai un ano en Torrelavega e de BTT o pasado mes xullo en Maceda, Iván Feijoo
fíxose en Valencia coa coroa que tanto desexaba. O ourensán tomou a iniciativa
da carreira na segunda volta con Jofre Cullel (Catalunya) e Xabier Murias
(Euskadi) a súa roda. Na loita entre os tres referentes desta categoría, o
corredor galego foi o máis combativo, pero non conseguía distanciarse.
A zona de area pouco antes de
meta era o principal momento ofensivo e a falta de dúas voltas para o final un
novo arreón de Feijoo descolgou uns metros a Muria, unha iniciativa que
secundou Cullell e que eliminou ao vasco da loita polo ouro. Tras o último paso
por meta o galego e o catalán mantiveron a igualdade e a carreira decidiuse nos
metros finais con vitoria para o de Allariz cun tempo de 38 minutos e 57 segundos.
“Sabía que se entraba primeiro na
zona de arena ía gañar e así foi. Saín por diante de Jofre e por fin puiden
gañar o campionato. Adícolle este triunfo ao meu pai, a toda a miña familia e a
Xulio Conde (máximo responsable do Clube Ciclista Maceda). Agora toca loitar
nas dúas probas da Copa do Mundo que quedan e intentaremos sorprender no
Mundial para darlle unha alegría a España”, indicou Feijoo, que na meta superou
en 2” a Cullel, e en 24” a Murias. No resto de participantes da Selección de
Galicia destacou o sétimo posto de Guillermo García, a 1:20 do gañador. Pola
súa parte, Jorge Suárez foi 13ª e Pablo Álvarez (19º), mentres que o tamén
galego Abel Franco (Movistar) logrou a 10ª praza.
Man a man nos cadetes
Un desenlace similar ao da
competición junior viviuse na carreira cadete masculina, pero neste caso o
ciclista galego tivo que conformarse co segundo posto. Carlos Canal seguiu a
estela na recta de saída do defensor do título Gonzalo Inguanzo (Cantabria). Co
man a man servido entre os dous, o de Xinzo de Limia estivo máis activo
intentado sorprender ao longo de toda a proba ao seu rival. As súas ofensivas
ampliaron a vantaxe do dúo de cabeza a 16” respecto aos seus perseguidores a
falta de dúas voltas.
Na resolución da carreira
Inguanzo conseguiu abrir unha mínima diferenza de 2 segundos sobre Canal e esa distancia resultou
definitiva para que o cántabro se impuxera despois de 28 minutos e 47 segundos
de esforzo. O podio completouno o madrileño Daniel Eguía, que na meta cedeu 35”
respecto o gañador. O rosaleiro Mario Fernández, da Selección de Galicia,
estivo moi preto dos mellores e rematou sexto a 48”. O outro cadete do
combinado autonómico, Borja Lorenzo, non completou a proba.
Saa, cerca do bronce
O éxito da delegación galega, e
en especial dos ciclistas do Maceda, estivo a piques de materializarse nunha
terceira medalla nesta xornada de clausura. A cadete Noela Saa, de primeiro
ano, formou parte do cuarteto que comandou de inicio a súa carreira e ata a
última volta mantivo opcións de colgarse o bronce.
Finalmenete, a ourensá non puido co ritmo da
valenciana Bonillo e cruzou a liña de meta en quinta posición a 33” da
vencedora María Parajón (Madrid). Catro segundos máis tarde que Saa concluiu
Carla Fernández (Selección de Galicia), no sexto posto, e Galicia tamén contou
entre as dez primeiras con Aida González, oitava. Antía Martínez (16ª) e Andrea
García (17ª) foron as outras representantes do conxunto galego.
Con Mauro González, 19º na
carreira Elite, pechouse a participación da selección autonómica. Dous ouros e
dúas pratas foi o seu brillante resultado, superando as tres pratas do ano
pasado en Cantabria. Ademais, o ciclismo galego festexou outra medalla en
Valencia co bronce asinado por Luciano Carretero (Cambre Renault Caeiro) na
categoría Máster-30A. Departamento de comunicación