O presidente da Xunta, Núñez Feijóo, anunciou
hoxe na rolda de prensa do Consello un investimento de 12 millóns de euros en
formación especializada para 3.000 traballadores do sector naval galego.
Feijóo
precisou que este plan sectorial de formación especializada, que se levará a
cabo entre este ano e 2018, suporá a realización de 170 cursos para persoas
tanto desempregadas como ocupadas, ademais de incluír a modernización de
centros formativos en Vigo e Ferrol.
Así mesmo,
subliñou que esta iniciativa ten como obxectivo facer fincapé nas novas
tecnoloxías vinculadas coa Industria 4.0, ao tempo que se dota aos centros dos
equipamentos necesarios para impartir esta cualificación. Non en van, permitirá
multiplicar por cinco tanto o investimento como os cursos realizados durante os
dous anos anteriores (2015-2016) en materia de formación no sector.
Cómpre
subliñar que o novo plan prestará unha atención especial aos desempregados do
naval, a través de formación específica en soldadura, tubaxe e demais accións
relacionadas co sector en centros públicos de Ferrol, A Coruña, Vigo, Valga,
Cee, Fene e Bueu e entidades homologadas pola Administración autonómica.
Nestas dúas
liñas de actuación os alumnos poderán optar ás becas da Xunta para
facilitarlles a asistencia aos cursos, os apoios para financiar os gastos
correspondentes ao transporte e manutención e para a conciliación da vida
familiar.
Para as
persoas sen emprego haberá tamén 20 unidades formativas nas empresas do naval.
Os beneficiarios desta convocatoria serán as firmas con máis de 50 traballadores
que poderán programar a formación máis específica e adaptada ás súas
necesidades de produción. A Xunta financiará o 100% da formación e as firmas
que superen esta porcentaxe poderán recibir incentivos á contratación que poden
chegar aos 9.000 euros.
En total,
para a formación de desempregados investiranse ao redor de 7,5 millóns de euros
para poñer en marcha preto de 90 cursos e 20 unidades formativas para máis de
1.600 persoas, segundo subliñou o titular do Goberno galego.
En relación
á formación para traballadores, Feijóo precisou que as accións formativas
desenvolveranse nos centros homologados pola Xunta e, ademais, impartirase
cualificación a través de organismos intermedios en novos procesos industriais
vinculados á Industria 4.0.
Logo de precisar
que as especialidades a impartir serán identificadas polo propio sector e os
axentes sociais e económicos, o responsable do Goberno autonómico afirmou que
con esta iniciativa a Xunta prevé especializar en dous anos ao redor de 1.300
profesionais do sector, cun investimento de 3,5 millóns de euros e 80 cursos.
O plan
destinará tamén un millón de euros á modernización de varios centros: o centro
de FP ocupacional de Ferrol e do Centro integrado de FP de Vigo, co obxectivo
de renovar os talleres de soldadura, tubaxe, mecanizado e electricidade, entre
outros.