NOS CONCELLOS DE TRASMIRAS E CHANTADA
O Banco de Terras cederá tres parcelas ao Ingacal
O director xeral de Desenvolvemento Rural vén
de iniciar o trámite para ceder tres parcelas do Banco de Terras nos concellos
de Trasmiras e Chantada ao Instituto Galego da Calidade Alimentaria (Ingacal) co
fin de crear campos de experimentación con variedades locais de carballos. O
proxecto forma parte do convenio subscrito coa Fundación Juana de Vega co fin de
conservar a diversidade desta especie en Galicia.
En concreto, este acordo pretende crear
plantacións de Quercus robur máis
variadas que as que existen na actualidade, xa que van reunir árbores de
diferentes procedencias xeográficas da mesma zona climática. Así lograranse
parcelas dun alto valor xenético en terreos propiedade da comunidade autónoma.
O convenio, no que traballa o centro de
investigación forestal de Lourizán por parte da Consellería do Medio Rural,
contemplaba un plan de actuación que comezaba polo recoñecemento e mostraxe
previo nas plantacións selectas, a marcaxe das árbores parentais e a toma de
mostras de landras. Durante o ano pasado levouse a cabo a plantación en dous viveiros
de Lugo e Pontevedra das landras recollidas e seleccionáronse as parcelas para
a plantación de aproximadamente unha hectárea cada unha.
Precisamente por este motivo solicitouse ao
Banco de Terras a cesión dunha serie de predios, tramitación que xa comezou por
parte da Axencia Galega de Desenvolvemento Rural (Agader) ao amparo da Lei de Mobilidade
de Terras, que permite a cesión gratuíta da titularidade a administracións
públicas por fins de interese social, medioambiental ou de infraestruturas.
Os predios finalmente seleccionados están dous
sitos no concello de Chantada e outro no de
Trasmiras. Agora comeza a tramitación da cesión dos tres ao Ingacal,
proceso que se alargará uns tres meses. Unha vez en propiedade do Ingacal, o
centro de Lourizán procederá á repoboación destas fincas coa selección
mellorada de exemplares. En total, o orzamento de execución deste convenio
ascende a 89.783,28 euros.