VACA E BOI DE GALICIA
Xunta e Ternera Galega ultiman o proceso de creación da indicación xeográfica protexida
A Consellería do Medio Rural ten previsto
publicar no Diario Oficial de Galicia (DOG) antes de que remate este mes de
marzo a decisión favorable en relación coa inscrición da Indicación Xeográfica
Protexida (IXP) Vaca e Boi de Galicia no rexistro comunitario correspondente.
Xunto con esta resolución, darase tamén publicidade ao prego de condicións da
IXP.
Así llelo anunciou a directora xeral de
Gandaría, Agricultura e Industrias Agroalimentarias, Belén do Campo, aos
responsables da Indicación Xeográfica Protexida Ternera Gallega –impulsores desta iniciativa, en colaboración coa
Xunta– nunha xuntanza de traballo.
A reunión
serviu, precisamente, para ultimar esta decisión, que comportará unha maior
protección e posta en valor da carne fresca procedente das
vacas e bois da nosa comunidade. Este produto obtense das principais razas
existentes, que son a Rubia Galega, Morena Galega, Asturiana de los Valles, Limusina,
Rubia de Aquitania e Frisona.
Para recibir o selo da IXP Vaca e Boi a carne
deberá presentarse refrixerada, sen que poida ser conxelada en ningún momento
ao longo do proceso de obtención e comercialización. A vaca caracterízase por
ser unha femia con alomenos unha xestación antes do sacrificio. O boi debe ser
un macho castrado antes do ano de vida e que supera os 48 meses de idade antes
do sacrificio.
Esta Indicación Xeográfica Protexida abarcará
a totalidade do territorio galego. Os animais deben nacer, criarse, engordarse,
sacrificarse e despezarse en Galicia, co obxectivo de preservar a
especificidade e controlar as condicións de obtención do produto. Cada fase
constará dun etiquetado concreto. Establecerase un consello regulador único
segundo os acordos para a indicación xeográfica protexida da tenreira galega e
da carne de vaca e boi, co fin de manter unha relación entre estas dúas IXP.
Ternera Gallega
Nesta xuntanza tamén se avaliaron os bos
resultados da IXP Ternera Gallega no
2016, cun incremento de arredor do 4% nos diferentes indicadores de número de
explotacións amparadas, número de canais e toneladas de carne certificada
(foron 20.600 en toda a anualidade). Os responsables desta Indicación tamén
amosaron a súa satisfacción pola estabilidade rexistrada nos prezos do seu
produto en orixe.