A área de Cultura da Deputación da Coruña destina 1.329,602,12 € á programación dos concellos e 457.724 á de entidades a través dunha Rede Cultural que supón un importante balón de osíxeno para o sector das artes escénicas e musicais ao mover arredor de tres millóns de euros para a realización de actividades culturais na provincia da Coruña.
A Rede Cultural alcanza unha singular dimensión nesta nova edición en que a Deputación da Coruña concede todas as actuacións e propostas culturais solicitadas polos concellos. As cifras totais publícanse este mércores, día 12 de abril, no BOP na resolución da primeira fase de adxudicación destinada aos concellos. Neste apartado, a área de Cultura da Deputación da Coruña compromete 1.329.602,12 € para os concellos, unha cantidade que se incrementará cos 457.724 € que se sumarán coas propostas solicitadas polas entidades que se presentaron na Rede.
Nos últimos dous anos incrementouse notablemente a cantidade investida pola Deputación da Coruña neste potente motor de dinamización económica e cultural pasando dos 995.290,68 € do ano 2015 a case o dobre nesta anualidade.
En total, serán 1.787.326,12 os euros que a área de Cultura da Deputación da Coruña investirá na súa Rede Cultural, un circuíto que este ano moverá, segundo os cálculos que se manexan co incremento das achegas correspondentes a concellos e entidades, un total de 2.894.905,45 euros. No programa, ademais, a Deputación da Coruña garante o pagamento por parte dos concellos e entidades a grupos e compañías que participan na súa Rede.
“A Rede Cultural vertebra culturalmente os concellos da provincia ofrecendo a posibilidade de que concellos pequenos e medianos poidan desenvolver espectáculos actuais e de altísima calidade. Supón máis un paso no deseño dunha política cultural que achegue á veciñanza a vangarda creativa no noso país”, explicou a vicepresidenta e responsábel da área de Cultura da Deputación da Coruña, Goretti Sanmartín Rei. “Significa tamén unha importante activación económica para un sector como o cultural especialmente necesitado de apoio que faga posíbel a súa viabilidade e garanta o seu futuro”, engadiu Goretti Sanmartín Rei, que destacou a gran relevancia para as empresas e persoas que traballan no sector cultural xa que se moven, a través deste programa, case tres millóns de euros nesta anualidade.
A resolución pola que se aproba a adxudicación aos concellos da provincia dos espectáculos correspondentes ao programa Rede Cultural 2017. Máis información