O Centro Dramático Galego (CDG) ultima os
ensaios de Martes de Carnaval, a nova
produción que a compañía teatral da Xunta de Galicia estrea o vindeiro xoves 20
na súa sede do Salón Teatro de Santiago. Será a primeira vez que se poñan en
escena en galego os esperpentos de Valle-Inclán As galas do defunto e A filla do capitán, as dúas pezas do
espectáculo, dirixido por Marta Pazos, cun elenco de 10 intérpretes e un equipo
artístico de 13 recoñecidos profesionais de toda a Península.
A representación galega no devandito equipo –que
traballa man a man co cadro técnico do CDG– corre a cargo de Rut Balvís no
traballo de movemento, Uxía Vaello no deseño de vestiario, Esther Quintas
Salgado na caracterización, Manuel Cortes na tradución de Valle-Inclán ao
galego, Rosa Moledo na asesoría lingüística, Gena Baamonde na asistencia de
dirección, José Faro ‘Coti’ na asistencia de escenografía e iluminación, María
Villas na asistencia de vestiario e José Díaz na asistencia de produción. Este
último asina tamén a música orixinal de Martes
de Carnaval xunto co portugués establecido en Galicia Hugo Torres, quen se
fixo cargo así mesmo da asesoría de dramaturxia.
Desde Portugal, contribúen a esta posta en
escena Fernando Ribeiro no deseño da escenografía e José Álvaro Correia, no da
iluminación. Ambos contan cunha destacada traxectoria no seu país, asinando
traballos para prestixiosas compañías, como o Teatro Nacional São João do
Porto. Pola súa banda, Ernesto Arias, vinculado ao Teatro de la Abadía de Madrid
desde a súa fundación, é o encargado do traballo de palabra desenvolvido xunto
ao elenco de Martes de Carnaval.
Incorporación
ao repertorio en galego
O equipo participará na presentación da
montaxe aos medios de comunicación o vindeiro martes 18 no Café Bar Derby de
Santiago, un dos lugares frecuentados por Valle-Inclán durante a súa estadía en
Compostela. Con esta produción, o CDG contribúe á incorporación do gran autor
arousán ao repertorio teatral en galego no ano en que quedaron liberados os
dereitos da súa obra. As actrices Iria Azevedo, Mercedes Castro, Anabell Gago e
María Roja, e os actores César Cambeiro, Miquel Insua, Alejandro Jato, Pablo
Rivero Madriñán, Machi Salgado e Sergio Zearreta interpretan este espectáculo,
dando vida aos máis de 30 personaxes que suman as pezas As galas do defunto e A filla do capitán.
Tras as súas primeiras funcións en Compostela
–do 20 ao 23 de abril para público xeral e do 24 ao 27, matinais para
escolares–, o espectáculo viaxará a Tui, O Barco de Valdeorras, Ourense, A
Coruña, Rianxo, Valencia, Pontevedra e Vigo, para regresar ao Salón Teatro de
Santiago do 28 de xuño ao 16 de xullo.