A CORUÑA
Feijóo chama a transformar a Coruña paralizada de Podemos nunha "Coruña imparable"
A Coruña.- O presidente do PPdeG, Alberto Núñez Feijóo, chamou hoxe a
transformar a Coruña paralizada polo goberno municipal das Mareas de Podemos
nunha “Coruña imparable”.
Así se expresou o líder dos populares galegos na clausura do Congreso local
do PP coruñés, onde estivo acompañado pola presidenta electa, Beatriz Mato, e
polo presidente provincial, Diego Calvo. Como alí recoñeceu, se miramos cara
atrás, vemos que esa cidade é hoxe moi diferente á que prometeron os populistas
fai dous anos.
Nese senso, Feijóo lembrou que dentro doutros dous anos, os coruñeses
poderán volver votar tendo dun lado a “Coruña anestesiada” que vemos
actualmente no Concello e, do outro, un Partido Popular que responde a ao que
quere “a Coruña real”: unha cidade activa, viva, puxante, ilusionante e en
forma.
A Coruña merece más
“Estou plenamente
convencido de que A Coruña merece máis”, asegurou o presidente engadindo que
merece compromiso co crecemento e co emprego, que se trate con respecto aos
seus símbolos a nivel internacional e que precisa dun proxecto de sentido
común, pensado para todos os coruñeses.
Tal e como apuntou, onde hoxe hai falta de ideas, confrontación,
inactividade e parálise, os populares teñen que poñer experiencia, ilusión,
propostas para a maioría, dinamismo e vitalidade. “Temos que ser capaces de
traer de novo a esta cidade o proxecto que se merece”, subliñou.
A enerxía de Beatriz Mato
“Escollestes á mellor
corredora para esta carreira de fondo: Beatriz Mato”, dicía Feijóo durante a
súa intervención. “Bea é pura enerxía, e iso é o que A Coruña necesita”,
remarcou.
Como lembrou, hai oito anos, decidiu poñer esa enerxía ao servizo de
Galicia ofrecéndolle ser conselleira no seu primeiro Goberno. Deste xeito, puxo
en valor a súa traxectoria á fronte da Consellería de Traballo e Benestar nuns
anos moi complicados e no departamento de Medio Ambiente e Ordenación do
Territorio, para sacar adiante unha histórica Lei do solo e o seu regulamento e
para contribuír a unha Galicia máis verde e sustentable.
De igual modo, asegurou que Mato “será tamén a enerxía indispensable no
Partido Popular da Coruña” e que durante os vindeiros dous anos, será necesario
que “Bea e todos vós derrochedes enerxía para conseguir unha cidade mellor”.
Tres claves para o futuro
Segundo o líder dos populares galegos, o partido necesita reunir tamén
outras tres características: estar unido, ser integrador e ser optimista.
Feijóo salientou así que na construción dunha alternativa de Goberno non sobra
ninguén. “Hoxe pechamos democraticamente o debate entre dous proxectos de
partido e abrimos democraticamente a defensa dun único proxecto de cidade”,
engadiu.
Así mesmo, remarcou que a formación ten que ser integradora porque “na
Coruña hai moitas persoas que comparten a nosa idea de cidade, pero que non son
do Partido Popular”, e, xa por último, apuntou que deben ser optimistas “porque
escoitando e propoñendo faremos realidade o noso obxectivo”. “Non me cabe
ningunha dúbida de que o que foi posible en Galicia tamén poderá selo na
Coruña”, concluíu.