Feijóo apoiará o sector pesqueiro na Feira de Bruxelas
O presidente da Xunta, Núñez Feijóo, apoiará
o sector marítimo pesqueiro galego na feira Seafood
de Bruxelas, que se celebrará na capital belga a próxima semana, desde o 25 ata
o 27 de abril.
Feijóo
viaxará mañá luns á capital comunitaria, onde permanecerá ata o martes e
manterá reunións co comisario de Enerxía e Clima, Miguel Arias Cañete, e co
comisario de Investigación, Ciencia e Innovación, Carlos Moedas, entre outros.
O martes 25
de abril, o responsable do Executivo galego e a conselleira do Mar, Rosa
Quintan, reuniranse pola mañá co director xeral de Asuntos marítimos e pesqueiros
da Comisión Europea, Joâo Aguiar Machado. E posteriormente, visitarán a feira Seafood de Bruxelas, onde realizarán un
percorrido polos expositores das empresas galegas.
Cómpre
salientar que a Seadfood é unha feira
anual de referencia a nivel internacional, como demostran os datos da pasada
edición, na cal se deron cita máis de 26.000 profesionais do sector,
procedentes de máis de 140 países, para promover os seus produtos, equipos de
procesamento e servizos.
Con esta
viaxe, o presidente da Xunta dará continuidade ás relacións bilaterais que
Galicia vén mantendo cos responsables europeos de asuntos prioritarios para a
nosa Comunidade.
Así, Feijóo
abordará, entre outros asuntos, o papel estratéxico de Galicia en áreas como a
pesca, e os principais retos de futuro aos que se enfronta o sector como
consecuencia do Brexit; ou o
posicionamento de Galicia sobre o futuro da PAC. En materia de medio ambiente,
trasladará a aposta da Comunidade polas enerxías renovables e, no eido do emprendemento
incidirá no papel que a I+D+i está a ter como motor de impulso do tecido
económico e industrial galego.