Os atletas David Santos Domínguez (Verxel
Nutrición Deportiva) e Paula Mayobre González (Club Atletismo Clínica Dental
Seoane Pampín) foron os gañadores da cuarta edición da Carreira Pedestre do
Concello de Frades, que congregou onte a 286 atletas e a
varios centos de veciños e afeccionados ao atletismo en Ponte Carreira
(Frades). Unha carreira que estivo marcada polas malas condicións
climatolóxicas, xa que choveu debilmente nas probas dos máis pequenos pero a
intensidade das precipitacións foise incrementando segundo pasaba o tempo.
Especialmente forte foi a tromba de auga que caeu durante a proba absoluta, que
a endureceu moito para os atletas.
De feito, o mal tempo propiciou que dos 372
corredores inscritos tan só 286 tomaran a saída. Despois de tres anos seguidos
conseguindo subir ao podio, finalmente o ordense David Santos proclamouse por
primeira vez gañador absoluto cun tempo de 26 minutos e 48 segundos en cubrir
os 8,6 quilómetros da proba. Unha carreira que dominou en solitario dende os
primeiros 500 metros e que lle permitiu sacar case dous minutos ao segundo
clasificado a pesar de que na liña de meta se parou para bicar á súa parella e
mesmo facer os últimos metros acompañados por varios nenos e baixo unha forte
treboada.
O segundo posto foi para Amador Pena Torreira
(Club Deportivo Vagalume Energía) cun tempo de 28 minutos e 38 segundos.
Completou o podio Jacobo Gesto Lago (Marineda Atlético) cun tempo de 28 minutos
e 43 segundos. Tamén recibiron premio en metálico Miguel Penedo Taboada
(3&Run by Pedro Nimo) e Javier Campos Suárez (USC).
Categoría feminina
Na categoría feminina Paula Mayobre González,
segunda en 2016, volveu subir ao máis alto do podio de Frades. A atleta de Ares
chegou nun meritorio posto 14 da proba absoluta, cun tempo de 30 minutos e 42
segundos. Deste xeito, Mayobre suma tres victorias da Carreira Pedestre de
Frades.
A segunda foi Rocío Alvite Ferreiro (Atletismo
Sar-Vermú Petroni), cuarta na pasada edición. Fixo un tempo de 31 minutos e 3
segundos, chegando no posto 17 da xeral. Completou o podio outra habitual desta
carreira: Raquel Suárez Pedrosa (Ría de Ferrol), quinta clasificada en 2016 e
que este ano foi terceira cun tempo de 31 minutos e 56 segundos. Tamén
recibiron premio María Carmen Penas Blanco (Club Deportivo Vagalume Energía) e
Aurea Retamal Muñiz (Clube Atletismo Milladoiro), como cuarta e quinta
clasificadas.
Ademais dos correspondentes trofeos, estes dez
primeiros clasificados de ambas categorías levaron uns premios en metálico de
300, 200, 100, 75 e 50 euros, respectivamente. O gañador da proba por equipos
foi por segundo ano consecutivo o Club Atletismo Milladoiro, seguido polo Club
Atletismo Sar Vermú Petroni e o Club Deportivo Vagalume Energía, que se
repartiron uns premios de 200, 100 e 75 euros, respectivamente. O mellor club
feminino foi o Club Atletismo Sar-Vermú Petroni, que levaron 150 euros.
Os premios foron entregados polo alcalde de
Frades, Roberto Rey Martínez, quen estivo acompañado polos concelleiros de Deportes,
Jesús Miguel Prado; Maiores, Jesús Francos;
Medio Ambiente, Juan Carlos Portos; Servizos Sociais, Ángeles Álvarez;
Infraestruturas, Ramón Garabato; e Xuventude, Óscar Botana. Roberto Rey
agradeceu o bo traballo desempeñado pola Federación Galega de Atletismo e
Emesports, así como a colaboración dos membros de Protección Civil de Ordes e
Ambulancias Nordés, que permitiron que a proba se desenvolvese sen incidencias.
Así mesmo, agradeceu a colaboración prestada pola Xunta de Galicia, que
repartiu leite galego a través da campaña Galega 100%, e polos patrocinadores
da proba: Deputación da Coruña, Pepsico, Feiraco, Erimsa, Infantilandia,
Cooperativa Central de Frades, Camba SL, Froitería A Nova, Bar Vilariño, Centro de Fisioterapia e Rehabilitación Jessica Gómez, Supermercados
Claudio (María Vázquez Pardo), Correrengalicia e Carreirasgalegas.
Roberto Rey, Jesús Miguel Prado e Ángeles Álvarez
fixeron entrega de medallas e lambonadas a todos os participantes nas probas
escolares. Todos os atletas levaron unha camiseta de agasallo e desfrutaron dun
avituallamento en meta a base de auga, bebidas enerxéticas, leite e froita,
cortesía dos patrocinadores da proba, así como chocolate quente, moi agradecido
nunha tarde fría e chuviosa como a de onte. Ademais dos tradicionais servizos
de ducha e roupeiro, os participantes que o precisaron puideron gozar tamén dun
servizo de fisioterapia totalmente de balde. Departamento de comunicación