A Xunta crea a Comisión Organizadora do Xacobeo 2021
O presidente da Xunta, Núñez Feijóo, avanzou onte a creación da Comisión Organizadora do Xacobeo 2021 co fin de convertelo no mellor Ano Santo da historia de Galicia. Neste senso, o Goberno galego aproveitará a dobre vantaxe que ofrece o contexto actual: hai marxe para poder preparalo de xeito tranquilo e concienciudo e a situación económica pode ser ostensiblemente mellor que a do Xacobeo 2010.
Logo de lembrar que o Camiño de Santiago ten cada vez máis tirón, o xefe do Executivo galego asegurou que a Xunta afronta a organización do Xacobeo 2021 coa esperanza de que marque unha década na comunidade e sexa un revulsivo no que poidamos consolidar Galicia como destino único, espiritual e turístico e poidamos poñer en valor a nosa imaxe a nivel nacional e internacional.
Con este dobre obxectivo, nace a Comisión Organizadora do Xacobeo 2021, un órgano que se dedicará con estabilidade e permanencia a preparar o evento e que facilitará que todos os departamentos da Xunta e do resto de administracións e institucións implicadas traballen de xeito coordinado.
Así, as súas funcións serán, entre outras: coordinar as actuacións das diferentes administracións públicas actuantes, en especial a Xunta de Galicia e os concellos galegos; aprobar o Plan Estratéxico do Xacobeo 2021 e os diferentes Plans Operativos Anuais de desenvolvemento; aprobar a marca e o logo do Xacobeo 2021; buscar patrocinadores privados; propoñer as exencións fiscais aplicables a estes patrocinadores privados; elaborar e aprobar a programación do Xacobeo e traballar na difusión deste evento.
Segundo destacou Feijóo, o Xacobeo é unha ocasión inigualable porque reforzará un dos nosos mellores embaixadores, o Camiño de Santiago, e actuará como un dinamizador de primeira no ámbito relixioso, no cultural e no económico. Trátase dunha oportunidade histórica e, por tanto, non se debe dilatar a súa preparación, senón que vai centrar os esforzos do Goberno galego desde este momento.
A composición da Comisión Organizadora Xacobeo 2021
Este novo órgano estará composto por un presidente, que será o titular da Xunta; un vicepresidente primeiro, que será o conselleiro de Cultura, Educación e Ordenación Universitaria; un vicepresidente segundo, que será a directora de Turismo de Galicia; varios vogais procedentes de diferentes consellerías e organismos da Xunta con competencias, así como representantes do Concello de Santiago de Compostela, do Arcebispado e dos concellos polos que pasan os camiños de Santiago. Ademais, haberá un secretario con voz e sen voto procedente da Consellería de Cultura, Educación e Ordenación Universitaria.
A Comisión, que estará adscrita á Presidencia da Xunta, tamén nomeará de entre os seus membros unha comisión executiva de oito membros entre os que estarán os vicepresidentes.