OURENSE
A Xunta presenta ao comercio ourensán a nova liña de axudas
Ourense.- A directora xeral de Comercio e Consumo, Sol Vázquez Abeal, mantivo hoxe un encontro informativo con representantes do comercio ourensán para explicarlles de primeira man as características da nova liña de axudas que a Xunta ten activado para impulsar a expansión comercial e dixital dos seus negocios.
A Consellería de Economía, Emprego e Industria destina 2 millóns de euros para o conxunto da comunidade co obxectivo de chegar a máis de 130 proxectos no comercio de proximidade galego, contribuíndo así á mellora da competitividade do sector. O programa está destinado a pemes que veñan desenvolvendo a súa actividade comercial en Galicia durante os últimos dous anos, impulsando así o seu crecemento e innovación. Os interesados poden solicitar a súa participación ata o vindeiro 11 de setembro.
Por unha banda, apoiaranse con ata 30.000 euros os proxectos de expansión comercial, para a apertura de novos establecementos. O proxecto poderá basearse no desenvolvemento do mesmo proxecto comercial que xa estaba en marcha, na especialización ou diversificación de produtos, na especialización de servizos ao cliente ou en novas tendencias de consumo, e deberá incluír un compromiso de contratación de polo menos un traballador. Estas iniciativas deberán, así mesmo, responder a unha idea comercial innovadora.
Por outra parte, concederanse axudas de ata 3.500 euros para proxectos piloto pop up, consistentes na apertura por un prazo máximo de dous meses dun novo establecemento nun concello distinto ao que o comerciante veña desenvolvendo a súa actividade para testar un mercado ou un proxecto comercial innovador.
Os comerciantes tamén poderán acceder a apoios de ata 1.080 euros para a súa expansión dixital, co obxectivo de acceder a asesoramento profesional e especializado para a implantación e titorización dun plan de comunicación dixital personalizado e axeitado ao target do comerciante, definindo unha estratexia comercial dixital de expansión.
O novo programa enmárcase no Plan Estratéxico de Impulso ao Comercio de Galicia, que contempla 55 accións específicas ata 2020, e que ten entre os seus retos o establecemento dun novo modelo de comercio intelixente que sitúe ao cliente no centro da súa estratexia aproveitando todos os recursos á súa disposición.