Galicia acada 3,6 millóns de turistas nos oito primeiros meses do ano
.jpg&x=305)
O número de turistas volveu medrar nos oito primeiros meses en Galicia, ata acadar 3,6 millóns de viaxeiros aloxados, o mellor rexistro acadado ata agora. Este crecemento vén acompañado da evolución positiva, moi beneficiosa para o sector turístico da Comunidade, da cifra de pernoitas e da estadía media.
De xaneiro a agosto, os establecementos regrados da nosa Comunidade (hoteis, pensións, apartamentos turísticos, cámpings e casas de turismo rural) contabilizaron un 5,1% máis de pernoitas, por riba da media estatal, ata as 7,6 millóns, o seu máximo histórico. A estadía media tamén viuse incrementada, en concreto un 2,7%, mentres baixou no resto de España.
O bo comportamento deuse entre os turistas procedentes doutras comunidades autonómas e entre os chegados desde o estranxeiro. O número de viaxeiros nacionais creceu un 1,7% e a súa demanda elevouse un 4,3%. No caso do turista internacional, esta suba é aínda máis intensa, do 4,2% e o 7,8%, respectivamente, o que leva ao sector a obter rexistros récord.
Confianza renovada do turista nacional
A Enquisa de ocupación en aloxamentos turísticos extrahoteleiros de agosto publicada hoxe polo INE confirma os bos prognósticos, pois a cifra de viaxeiros mantívose estable nos niveis elevados de hai un ano e lográronse mellorar as pernoitas e a estadía media, parámetros considerados fundamentais na Estratexia do turismo de Galicia 2020, consensuada entre a Xunta de Galicia e o sector, e ao redor dos cales se veñen realizando importantes esforzos.
En concreto, o número de viaxeiros en agosto superou os 886.000 en toda a Comunidade, cun incremento do 3,7% das pernoitas, ata as 2,3 millóns, máximo histórico, e de preto do 4% na estadía. Os viaxeiros nacionais, que na temporada estival soen apostar por Galicia como destino, renovaron a súa confianza, cun crecemento do 4,7% no número de noites.
Por tipoloxía de aloxamentos, os establecementos hoteleiros concentraron o 71% do total de demanda turística, cun 57% do lado dos hoteis e un 14% nas pensións da Comunidade. O outro 30% optou polo segmento extrahoteleiro, cos cámpings (18,4%) e os apartamentos turísticos e o turismo rural, cada un co 5,2% da demanda. Cómpre subliñar a subida que se observa nos hoteis, do 9,6%, e nos apartamentos turísticos, que melloraron un 3,5%.
Balance dos meses centrais do verán
Os datos do INE coñecidos hoxe permiten facer un balance conxunto dos meses centrais do verán, xullo e agosto, nos que visitaron Galicia máis de 1,6 millóns de persoas. Tamén neste caso melloraron as pernoitas, pois superaron as 4 millóns, o que supón un máximo histórico, e a estadía media, que medrou un 3,6%, en ambos casos por riba da media estatal.