LUGO | A portavoz nacional do BNG, Ana
Pontón, visitou hoxe a cidade de Lugo coincidindo cun San Froilán atípico por
causa da COVID-19 e congratulouse de que o concello apostase este ano pola
“seguridade e a saúde” da cidadanía sen que se impida ter unha celebración máis
moderada para darlle vida a cidade.
Sobre a importancia de manter a prevención por mor da
pandemia, Pontón sinalou que considera un “feito escandaloso que sigan a
existir contaxios nas residencias de maiores do noso país sen que o goberno
tome as medidas necesarias para que se blinde a saúde e a vidas das persoas.”
Pontón engadiu que seis meses despois, e vivindo entre unha pandemia, “non
podemos seguir vendo a improvisación sen que a Xunta estea a actuar con
contundencia.”
Acompañada polo tenente de alcalde do Concello de
Lugo, Rubén Arroxo, e pola viceportavoz no Parlamento galego, Olalla Rodil, a
portavoz nacional quixo destacar, nun almorzo informativo coa prensa de Lugo, que
neste momento “hai que situar a Lugo no mapa tanto das inversións en
infraestruturas como no mapa do futuro e que haxa unha perspectiva de cara onde
ten que camiñar esta cidade e cal debe ser a implicación da Xunta.”
Adiantou que “nos próximos orzamentos que se están a
elaborar por parte da Xunta imos defender que as cuestións que afectan a Lugo
teñan a consignación suficiente como para que os proxectos pasen do papel aos
feitos” e concretou proxectos como a Ronda Leste, o Cuartel de San Fernando ou
o Barrio da Tinería. Tampouco esqueceu as inversións pendentes que atinxen ao
Estado como o remate da autovía Lugo-Santiago e a modernización do ferrocarril.
E imprescindible, concluiu, “facer unha fronte común para que tanto a autovía
como o tren cheguen a Lugo.”
Aposta pola innovación sustentable
Pontón introduciu, na súa alocución, un elemento que
considera chave para Galiza e tamén para Lugo “a innovación ten que ser un dos
eixos de desenvolvemento da nosa economía, da xeración de emprego, de riqueza e
de oportunidades”, e indicou que nese sentido “o Campus de Lugo conta con
centros de investigación en diferentes ámbitos e hai que facer unha aposta
estratéxica para situar a Lugo como referente en materia de biodiversidade,
desenvolvemento rural e cambio climático”, e suxeriu que o país debera de facer
un esforzo inversor en I+D+i que se duplique nos vindeiros catro anos. Departamento de comunicación