SELECCIÓNS DEPORTIVAS GALEGAS
O BNG propón o recoñecemento oficial das seleccións deportivas galegas para poderen competir a nivel internacional
MADRID | O BNG
rexistrou unha iniciativa no Congreso instando ao recoñecemento oficial das
selección galegas para poderen participar en competicións de carácter
internacional a aínda a dotar as federacións deportivas galegas dos medios e as
ferramentas xurídicas necesarias para accederen ao recoñecemento internacional.
Así mesmo, a organización nacionalista criticou a actitude do Goberno español
ao non ter realizado ningunha acción para que se recoñeza de maneira oficial o
labor das seleccións galegas.
O tecido deportivo galego conta
hoxe cun alto nivel que compite e logra premios tanto a nivel estatal como no
marco internacional na maior parte de disciplinas. Ademais, en casos como o
fútbol gaélico, conta coa súa propia selección xogando en campionatos europeos e mundiais en que consegue
importantes galardóns.
Neste sentido, a formación
nacionalista apuntou que contando con “coas deportistas profesionais e coas
instalacións necesarias” e existindo a vontade de ser representados e
representadas como pobo “non entendemos como é posíbel que o Goberno continúe
pondo trabas para que as seleccións galegas poidan competir de maneira oficial
nos campionatos de carácter internacional”. Rego sinalou que “outras nacións
sen estado están a facelo: Escocia, Gales ou mesmo territorios como Xibraltar”
chegando a ser corenta e nove nacións sen Estado as que teñen unha ou máis
seleccións que compiten a nivel europeo ou mundial.
“Nin a lexislación española nin a
europea prohiben a oficialidade internacional das seleccións deportivas de
nacións sen Estado” incidiu o deputado nacionalista. Por este motivo, o Rego
rexistrou iniciativas para que o Estado recoñeza de maneira oficial as
seleccións galegas e poidan participar nas competicións internacionais en todas
as disciplinas deportivas, e para que achegue “os medios e soportes xurídicos
precisos para poderen tamén solicitar o recoñecemento internacional de forma
oficial”.
O deputado do BNG denunciou a
actitude do Goberno e sinalou que a motivación do executivo estatal obedece a
“criterios políticos e non xurídicos, co obxectivo de impedir que nacións sen
Estado como a Galiza compitan no eido internacional”. Rego lembrou que tanto a Constitución española
como o Estatuto de Autonomía recollen que as competencias en materia de deporte
as posúe exclusivamente a Galiza.
As actuais federacións deportivas
teñen un carácter xurídico-privado mais desde a organización nacionalista
entenden que “a integración dunha federación nacional na mesma sería
perfectamente posíbel” se as regras de admisión desa federación internacional
permiten a integración de federacións de nacións sen Estado e cumprindo sempre
o resto de requisitos que se exixiren. Departamento de comunicación