GALICIA
Galicia rexistra a taxa de falecementos máis baixa por suicidio
Os primeiros datos logo da posta en
marcha do Plan de Prevención do Suicidio en Galicia, en setembro de
2017, reflicten que en 2018 o número de falecementos por suicidio é o
máis baixo dende que existe o rexistro do Instituto de Medicina Legal de
Galicia (Imelga), no ano 2005. Segundo datos do Imelga, no 2018
faleceron en Galicia 288 persoas, o que supón un descenso do 11,11%
respecto a 2017 e de 100 falecementos menos respecto a 2014.
Entre
as accións levadas a cabo no marco do Plan de Prevención do Suicidio
destaca a actualización dos protocolos de prevención do suicidio no
ámbito hospitalario. Tamén se puxo en marcha o protocolo de prevención
do suicidio no ámbito escolar e a formación de bombeiros e persoal de
intervención de primeira liña, mediante a Academia galega de
emerxencias, e de profesionais sanitarios, a través da Axencia de
coñecemento en saúde. Así mesmo está previsto o establecemento de
comités multidisciplinares de prevención do suicidio en todas as
xerencias de xestión integrada, ademais doutras medidas.
Ademais,
entre os acordos acadados recentemente na segunda reunión do Consello
Interdepartamental de Coordinación para a prevención e atención das
condutas suicidas en Galicia, o departamento sanitario galego
desenvolverá unha vía rápida de actuación ante a conduta suicida. Con
esta medida, o Sergas vai facilitar o acceso á atención especializada en
saúde mental aos pacientes con risco de suicidio, co obxectivo de
mellorar a súa accesibilidade ao sistema sanitario para un axeitado
diagnóstico.
Xunto co anterior tamén se acordou avanzar na
colaboración co Imelga para mellorar a información sobre o suicidio e
levar a cabo programas asistenciais en grupos de risco (como familia e
achegados de falecidos por suicidio), así como utilizar o 061 como
teléfono único do suicidio, tanto para as persoas en risco como para o
seu entorno. Tamén se acordou priorizar a formación dos profesionais
tanto no ámbito sanitario como no social e o educativo, e se afondará no
convenio de colaboración asinado coa Universidade de Santiago (USC) hai
uns días.
Consello Interdepartamental
O Consello
Interdepartamental de Coordinación para a prevención e atención das
condutas suicidas en Galicia naceu para fomentar a coordinación en
materia de prevención do suicidio entre os diferentes sectores
implicados. O problema da conduta suicida require para a súa abordaxe a
atención desde diversos ámbitos, polo que é necesaria unha correcta
colaboración e coordinación entre as distintas institucións implicadas.
Entre
as funcións do Consello están a de supervisar a implantación do Plan de
Prevención do Suicidio en Galicia, valorar a información sobre os
indicadores das medidas estratéxicas do Plan e revisar periodicamente os
protocolos e as accións de coordinación desenvolvidas. No Consello
participan, ademais da Consellería de Sanidade, representantes das
Consellerías de Xustiza, Educación e Política Social, do 061, do Imelga e
da Federación de Asociacións de familiares e persoas con enfermidade
mental de Galicia (FEAFES).
Coa creación deste Consello, a
Consellería de Sanidade reafirma o seu compromiso en relación ao
problema do suicidio como unha prioridade na axenda da atención á saúde
mental, tal e como recoñece nas Estratexias Sergas 2014 e 2020 e no Plan
de Prevención do Suicidio en Galicia, entre outras iniciativas.