SANTIAGO | ATENEO
O sinfonismo galego protagoniza unha nova sesión dos Luns do Ateneo
Santiago de Compostela | O
Ateneo de Santiago organiza un luns máis os seus ben coñecidos Luns do Ateneo. Así,
para inaugurar o mes de xuño, o vindeiro luns, ás 20:00 horas na Rúa do Vilar, 19, de
Santiago, falará de “Sinfonismo galego dos séculos XX e XXI” cun dos máis
importantes compositores galegos como é Juan Durán, galardoado o pasado ano
2018 co Premio Reina Sofía de Composición.
Nesta
cita o compositor fará un breve percorrido pola música sinfónica galega dos últimos
anos, ilustrando a súa conferencia con exemplos musicais de obras e autores non
moi coñecidos do público pero esenciais para entender a nosa historia musical.
Juan
Durán está considerado pola crítica e polo público como o máis importante
compositor galego da súa xeración e o de maior proxección internacional, cun
catálogo no que a ópera e a música sinfónica e sinfónico-coral conviven cunha
importantísima produción de música de cámara e lied, ademais de infinidade de
arranxos e orquestracións de música popular galega. Ten escrito obras
encargadas polas dúas grandes orquestras galegas, a Real Filharmonía de Galicia
e a Orquestra Sinfónica de Galicia, e é autor de O arame, a primeira ópera
galega en máis de cen anos. A súa obra soa con frecuencia por todo o mundo baixo
a dirección de grandes batutas do noso tempo. Ademais do Premio Reina Sofía de
Composición, Juan Durán conta co Premio da Cultura Galega 2013, o Premio da Crítica
de Galicia ou o Premio Internacional de Música Sacra, entre outros. Máis información