A Xunta prestará apoio para aliviar a carga de traballo do xulgado do mercantil que tramita o caso Fadesa

O conselleiro de Presidencia, Administración Públicas e Xustiza, José Luis Méndez Romeu, afirmou na Coruña que, dentro das súas competencias, o seu departamento prestará todo o apoio que sexa necesario para aliviar a carga de traballo que suporá o caso Fadesa para o xulgado do mercantil da Coruña que tramita o concurso de acreedores. A preguntas dos xornalistas, Méndez Romeu declarou que ?un sumario de envergadura como o de Martinsa-Fadesa tradúcese nunhas novas necesidades ás que haberá que dar resposta?. O conselleiro expuxo que a Dirección Xeral de Xustiza xa tomou contacto con ese xulgado e xa coñece as súas necesidades, que deben ser avaliadas e decididas inicialmente polo Consello Xeral do Poder Xudicial e polo Ministerio de Xustiza. ?Na parte que lle corresponde á Xunta, haberá o apoio necesario para que ese xulgado poida funcionar?, asegurou o conselleiro. ?Lamentablemente as nosas competencias son moi cativas?, engadiu para facer un paralelismo co sumario do Prestige. ?A Xunta amosa a súa disposición para cooperar co Consello Xeral do Poder Xudicial e co Ministerio de Xustiza para que este xulgado non teña nin demoras nin atrancos e poida funcionar? con normalidade. Por outra parte, o titular de Presidencia anunciou que o vindeiro luns se reunirá en Zaragoza co ministro de Xustiza, no seo da Conferencia Sectorial onde se formalizarán o número de unidades xudiciais que se crearán no 2009. Méndez Romeu afirmou que ?o ministerio vai poñer sobre a mesa unha proposta moi interesante para ampliar os xulgados de violencia de xénero e aí teremos a garantía e o compromiso formal de quen ten a competencia para a oferta xudicial do ano próximo?. O conselleiro afirmou que ten a ?esperanza fundada de acadar un magnífico número de unidades xudiciais para 2009?.