Galicia acollerá en outubro un congreso internacional de políticas de xuventude

O director xeral de Xuventude, Rubén Cela, presentou o I Congreso Internacional de Políticas de Xuventude, que terá como tema a tratar "Xuventude e Novas Formas de Relación" e se celebrará o 31 de outubro no Palacio de Congresos e Exposicións de Galicia. Cela destacou que esta "é a primeira vez que Galicia acolle un evento de tal magnitude". A elección do tema "Xuventude e Novas Formas de Relación" débese a que "a realidade da mocidade é unha realidade cambiante", afirmou Rubén Cela. "Un rapaz de 18 anos xa ten unhas pautas de consumo e de comportamento moi diferentes de alguen 10 anos maior", polo que é precisa a análise periódica da situación da xuventude para o desenvolvemento de iniciativas políticas. Deste xeito, os obxectos da análise deste congreso serán non só as diversas propostas en política xuvenil nos países europeos, senón tamén a situación actual da mocidade galega e a relación que hoxe a xuventude desenvolve coas novas tecnoloxías da información (internet ou teléfono móbil) e o uso que os mozos fan do seu tempo de lecer, con problemáticas coma a do "botellón". No congreso participarán varios expertos en materia de xuventude de diversos países europeus. Entre eles cóntanse Cilia Willen, responsable de medios audiovisuais do proxecto Roots&Routes en Bélxica; Davide Cappechi, director da European Youth Information and Couselling Agency (Eryica); e Luis Nascimento, director do Instituo Portugués da Juventude. Rubén Cela declarou que se procura que as charlas e mesas redondas sigan un modelo participativo, na que as mozas e mozos que se acheguen podan aportar as súas opinións e propostas. Inscrición Este congreso ten como destinatarios a tódolos traballadores e interesados nesta materia, dende concelleiros da área de mocidade ate membros de asociacións xuvenís. Para a participación nesta actividade ofértanse unhas 350 prazas, das que 150 xa están cubertas. A data de inscrición finaliza o día 30 de setembro. O formulario pódese descargar no enderezo web www.xuventude.net, recollela nas principais oficinas de información xuvenil (OMIX) ou nos servizos de Xuventude das delegacións provinciais de Vicepresidencia.