MÚSICA

Berrogüetto editará en DVD o derradeiro concerto da súa xira "Kosmogonías"

O vindeiro 13 de novembro ás 21:00 horas o Auditorio de Galicia de Santiago de Compostela vivirá un momento único na carreira de Berrogüetto mediante a gravación dun concerto que se editará o vindeiro ano en DVD, segundo informaron fontes da banda.

A gravación deste concerto suporá a primeira ocasión na que este grupo, referencia internacional da música galega, recollerá en directo unha das súas actuacións. Deste xeito, o último concerto da xira estatal 'Kosmogonías' suporá un aliciente para os seus asistentes, arroupando a Berrogüetto e sendo protagonistas do seu novo traballo.

Para este concerto, Berrogüetto desenvolveu unha especial escenografía non vista durante a xira e que sorprenderá ao público. Así, acompañará a actuación dunha peza de videocreación deseñada en exclusiva pola artista Olaia Sendón.

O concerto de Santiago porá fin á xira que levou a Berrogüetto a escenarios de toda Galicia, ademais de cidades como Madrid, Zaragoza ou L´Hopistalet de Llobregat. O vindeiro DVD publicarase no ano 2011, coincidindo coa xira internacional 'Kosmogonías'. Este concerto suporá o comezo do ciclo 'Sons da Diversidade', organizado pola Concellaría de Cultura do Concello de Santiago.