CULTURA

Unha exposición itinerante, un congreso internacional e dez faladoiros, principais actos do Ano Cunqueiro

O Ano Cunqueiro empezou coa presentación pública do programa de actividades conmemorativas do centenario do escritor (1911-1981), que se iniciará en Vigo en febreiro e rematará en Mondoñedo a finais de decembro. Un calendario de actos entre os que destacan unha exposición itinerante, un congreso internacional e dez faladoiros, coordinados desde o Consello da Cultura Galega por Henrique Monteagudo nunha comisión inter-institucional integrada pola Consellería de Cultura, os concellos de Mondoñedo e Vigo, as universidades galegas e a Real Academia Galega.

As actividades do progama '2011, Ano Cunqueiro' comezarán nas rúas de Vigo o próximo 21 de febreiro. As obras do escritor sairán á rúa e os seus textos viaxarán nos autobuses da cidade na que pasou boa parte da súa vida. Xulio Calviño, concelleiro de Seguridade, tráfico e transportes, explicou que o acto central, no que intervirá Luís Emilio Batallán, terá lugar o 26 de febreiro no Centro Cultural de Novacaixagalicia.

Outro dos actos destacados celebrarase o 16 de abril, cando se rememorará no Seminario de Mondoñedo o ingreso de Álvaro Cunqueiro na Real Academia Galega e a resposta de Francisco Fernández del Riego, recentemente desaparecido. Cunqueiro fora proposto por Ramón Otero Pedrayo, Aquilino Iglesia Alvariño, Ricardo Carballo Calero e Domingo García Sabell.

Por outra banda, o conselleiro de Cultura e Turismo, Roberto Varela, anunciou o propósito de difundir a obra cunqueiriana a través dos centros dependentes do Ministerio de Asuntos Exteriores. Subliñou, asemade, a importancia de acoller algúns dos actos previstos na Cidade da Cultura recén inaugurada.