GALICIA
O PSdeG presentan mocións nos concellos
O secretario de
Política Municipal do PSdeG-PSOE, Iván Puentes, anunciou hoxe a presentación
nos concellos galegos dunha moción para reclamarlle ao goberno central que lles
permita dispor dos orzamentos necesarios para prestar os servizos que teñen
encomendados.
O responsable
socialista reivindicou a revisión da regra de gasto, do destino do superávit, a
débeda pública e as taxas de reposición de empregados públicos cos que o
Executivo central está a “asfixiar” ás entidades locais. Estas, sinalou,
reduciron o gasto computable no 1,2%, teñen hoxe un superávit de 6.847
millóns -a única administración sen déficit-, e cumpren co obxectivo de débeda
pública imposto polo Executivo.
Aínda así,
engadiu, “o Ministro Montoro segue a castigar economicamente aos concellos,
tratando ademais por igual a quen cumpriu coas súas obrigas e ten as contas
saneadas e a quen se endebedou ata a irresponsabilidade, o que se traduce na
imposibilidade de prestar servizos axeitados á cidadanía”.
Resumiu que os
concellos pídenlle ao goberno “flexibilidade” por que “queren reinvertir o
superávit no que é urxente e importante para os seus veciños”. Sinalou ás
necesidades en “infraestruturas, plans de emprego, políticas sociais e
educativas, programas de igualdade, proxectos de sostenibilidade ou recuperar
as plantillas para prestar os mellores servizos municipais”.
Considera “inaprazable”
contar con “municipios fortes, con capacidade de decisión e con recursos
acaídos para responder ás demandas cidadás” amparados por un “sistema de
financiamento estable e suficiente”. Lembra que o estrito control e económico
do Goberno foi “na dirección contraria”, deixándoos “sen posibilidades de
mellorar os servizos de benestar, crear novo emprego ou prestar os servizos de
proximidade encomendados”.
Puentes sinala
que as Corporacións Locais non poden utilizar o superávit en gasto corrente,
son discriminados con relación ao Estado e as comunidades autónomas, que non
teñen un límite de débeda parecido, e non poden contratar empregados públicos.
Moción
Por iso, os
socialistas presentan ao longo do día de hoxe nos diferentes concellos galegos
unha moción para pedirlle ao Goberno central a revisión e adecuación da regra
de gasto ás necesidades dos servizos públicos dos concellos e permitirlles que
destinen o superávit a promover servizos públicos.
Tamén reclaman
flexibilizar as actuais restricións á concertación de operacións de
endebedamento e modificar a taxa de reposición de empregados públicos,
elevándoa ao 150 por cento nos servizos de interese prioritario e ao 100 por
100 no resto de servizos municipais, de xeito que se podan ir recuperando os
empregos perdidos nos últimos anos na administración local.
Violencia de Xénero
Doutra banda e con motivo do Día Internacional contra a Violencia de
Xénero que se celebra o 25N, o PSdeG amosa o seu compromiso e prioridade nesta
cuestión e presentará a nivel local mocións contra a violencia que se exerce
cara as mulleres. Os socialistas consideramos que para contribuír a
erradicar a violencia de xénero precísanse medidas políticas e institucionais que aborden o problema de maneira integral
para erradicalo e sexan capaces de dar resposta ás necesidades específicas das mulleres vítimas e ás das súas fillas e fillos.
O PSdeG sostén que a loita contra a violencia de xénero
ten que ser un compromiso activo día a día, porque para erradicar a violencia requírese o compromiso individual
e colectivo durante todos os días do ano,
por este motivo desexamos que todos os partidos políticos apoien esta
iniciativa local.
Os socialistas/as solicitamos ao Goberno de España o
cumprimento do compromiso económico acordado no Pacto de Estado Contra a
Violencia de Xénero, ao obxecto de destinar vía transferencia aos Concellos, un
incremento anual de 20 millóns de euros durante os próximos 5 exercicios.
Ao longo deste mes os portavoces do PSdeG nos concellos
presentan mocións para solicitarlle ao Estado ese compromiso económico e a
devolución de competencias ás entidades locais, posto que consideramos
fundamental a función que deben realizar os concellos na prevención e atención
ás vítimas de violencia de xénero e por elo, entendemos necesario dotar de novo
aos concellos de competencias e partidas económicas axeitadas.
“As administracións locais son tamén unha peza importante
para loitar contra a lacra da violencia de xénero. Os concellos deben ter todos
os instrumentos necesarios para traballar na prevención así como na atención a
través de información, asesoramento, protección, apoio e acompañamento ás mulleres vítimas e ás súas fillas e fillos”,
afirma Icía García, Vicesecretaria Xeral de Igualdade do PSdeG. Departamento de comunicación