UNIVERSIDADE
A Deputación colabora coa UDC para financiar o Máster en produción e xestión audiovisual
A Coruña.- A Deputación da Coruña colabora coa Universidade da Coruña (UDC) para financiar o Master en produción e xestión audiovisual. O deputado de Promoción Económica e Emprego, José Luis García, e o xerente da Fundación Universidade da Coruña, Juan José Gómez Romero, asinaron o convenio de colaboración, mediante o cal a institución provincial achegará 24.225 euros, un 20% dos custos de funcionamento do postgrado.
En concreto, os fondos da Deputación irán destinados a financiar os servizos de administración e contratación, así como a docencia, que inclúe profesorado da UDC, doutras universidades e diversos expertos do mundo empresarial relacionados co sector audiovisual e os medios de comunicación.
O deputado responsable de Promoción Económica, José Luis García, destacou que a colaboración neste Máster se enmarca na “traxectoria de colaboración que une a Deputación e a UDC”. Entre os proxectos que desenvolven conxuntamente ambas entidades, destacan a creación da Cátedra de Dereito Local, o financiamento da programación cultural e de divulgación do coñecemento científico ou a realización da Enquisa de Infraestruturas e Equipamentos Locais (EIEL).
O Máster en produción e xestión audiovisual é un título propio, que oferta desde fai 18 anos a universidade coruñesa e no que colaboran a Fundación Santiago Rey Fernández-Latorre e a Fundación Amancio Ortega. Na actualidade, estanse formando 30 alumnos, dez deles procedentes de países de Sudamérica, nas especialidades de produción executiva e xornalismo multiplataforma. Departamento de comunicación