UNIVERSIDADE
Un artigo de investigación da UDC sobre turismo, premiado pola AECIT
.jpg&x=305)
Un artigo de investigación en turismo do investigador da Universidade da Coruña, Rubén Lado Sestayo -en colaboración con Luis Otero González e Milagros Vivel Búa, ambos da Universidade de Santiago de Compostela, e Onofre Martorell Cunill, da Universitat de les Illes Balears- acaba de obter o Premio ao Mellor Artigo de Investigación en Turismo que entrega a Asociación Española de Expertos Científicos en Turismo (AECIT).
O artigo "Impact of location on profitability in the Spanish hotel sector" publicouse na revista Tourism Management en febreiro de 2016. O xurado valorou o interese da investigación e a súa contribución para o turismo.
O traballo analiza a relación do rendemento con características do destino turístico, da empresa hoteleira e o tempo. Trátase dunha análise multinivel cun potencial altísimo de contribución a nivel académico. Así mesmo, este artigo presenta implicacións para a xestión hoteleira. A mostra traballada son 8.992 hoteis nun período suficientemente significativo de tempo (2005-2011).
Respecto á calidade do traballo, a pesar de que se publicou en 2016 e, polo tanto, leva a penas un ano dispoñible, ten xa sete citas na base principal da Web of Science. Isto colócao a tan só unha cita de situarse no 1% de traballos máis citados do ano 2016 na área de Economics & Business, de acordo con InCites Essential Science Indicators. Este indicador reflicte a actualidade do tema e a súa importancia para a investigación de primeiro nivel internacional.
De feito, actualmente, atópase entre o 1% e o 10% de traballos máis citados, postulándose como un dos principais traballos con potencialidade internacional de impacto científico.
Pola súa banda, a revista en que se publicou, Tourism Management, está incluída en Web of Science, dentro de Social Sciences Citation Index (SCCI) e no Journal Citation Report (JCR), onde ten un factor de impacto de 4.707 no 2016, ano en que se publicou o artigo premiado. Ademais, ocupa o primeiro decil na súa principal categoría, estando indexada en “Management”, “Environmental studies”, e “Hospitality, leisure, sport & tourism”.
Rubén Lado Sestayo é profesor na Facultade de Economía e Empresa, do departamento de Empresa e da área de coñecemento de Economía financeira e contabilidade. É membro do Grupo de investigación en regulación, economía e finanzas (GREFIN) da Universidade da Coruña e colaborador externo do Grupo de investigación Valoración Financeira Aplicada (VALFINAP) da Universidade de Santiago de Compostela. As súas liñas de investigación abranguen a economía do turismo, xestión financeira e o fracaso empresarial. Máis información