A CORUÑA
Afundación presenta unha mostra retrospectiva da obra de Jorge Castillo
A Coruña.- Afundación, a Obra Social de ABANCA, presenta a
exposición, en colaboración co Museo de Pontevedra, «Jorge Castillo. A visión dunha
obra», un percorrido pola obra do artista pontevedrés desde 1952 ata 2017. A
Sede Afundación da Coruña (Cantón Grande, 8) será a anfitrioa deste proxecto
expositivo que se abrirá ao público o próximo 20 de febreiro e se poderá
visitar ata o 2 de xuño, de luns a venres en horario de 17.00 a 21.00 horas e os
sábados e festivos de 12.00 a 14.00 horas e de 17.00 a 21.00 h.
A través de case cincuenta obras, entre pinturas e debuxos,
o espectador poderá internarse no enigmático e rico mundo artístico de Jorge
Castillo. Figuras illadas ou en grupo, naturezas mortas, paisaxes urbanos,
plantas, animais ou obxectos enmarcados en escenarios onde o tempo parece que
se detivo habitan as súas obras amosando ao espectador a particular visión de
Castillo, enormemente influenciada por todos os lugares que coñeceu ao longo da
súa vida motivado pola súa incansable busca estética, coma Buenos Aires, Xerusalén,
Nova York, Berlín, Eivissa, París ou Xenebra.
Esta mostra é, en definitiva, unha viaxe por cada etapa
de Castillo, un dos artistas máis internacionais e influentes da arte europea da
segunda metade do século XX. Departamento de comunicación