A Fundación Granell albergará a maior biblioteca de pintura surrealista de Galicia

A Fundación Granell albergará tralo verán a maior biblioteca de pintura surrealista de Galicia. Os máis de 8.000 volumes do autor foron cedidos pola súa viúva, Amparo Segarra, á Fundación compostelá, onde estarán á disposición do público. Nunha conversa telefónica con AGN, Amparo Segarra salientou a inclusión de fotografías, documentos e correspondencia de artistas surrealistas como André Bretón e Marcel Duchamp, ou co escritor Juan Ramón Jiménez pertencentes ao pintor galego. Os documentos, conservados ata agora na residencia da viúva en Madrid, trasladaranse á Fundación Granell. O mesmo acontecerá cunha colección de máis de 2.400 cadros, que inclúen a obra completa de Granell e doutros artistas como Picasso, Miró ou Maruja Mallo, segundo indicou Amparo Segarra. O Concello de Santiago prestou conformidade hoxe no pleno á cesión. O alcalde, Xosé Sánchez Bugallo, agradeceu a "xenerosidade" coa capital galega ao poñer a disposición da sociedade a obra do artista galego "dun xeito desinteresado". O Concello comprometeuse a manter a cesión do espazo na sé actual, a facilitar o traslado da doazón e a manter o financiamento da Fundación, incluídas as novas necesidades derivadas da almacenaxe das obras cedidas.