DEPUTACIÓN DA CORUÑA
A Deputación súmase cunha campaña propia á conmemoración do 8 de marzo
A Coruña.- “O noso camiño decidímolo nós!” é o lema da campaña que a Deputación da Coruña lanza con motivo do 8 de marzo, Día Internacional das Mulleres. A responsábel da área de Igualdade, Ánxela Franco sinalou que a institución se suma as reivindicacións da data e destacou o traballo pioneiro que están a facer desde a área para unha sociedade máis igualitaria. Ademais da campaña, na rolda de prensa presentouse a gala 16Mx8M que terá lugar o vindeiro sábado día 10 no Teatro Colón da Coruña.
“A Deputación da Coruña súmase ás mobilizacións e ás reivindicacións do 8 de marzo”, destacou Ánxela Franco que fixo referencia á moción aprobada no pasado pleno que mostraba o compromiso da institución coa igualdade e o apoio ás mobilizacións e paros laborais que se producirán arredor da conmemoración do Día Internacional das Mulleres.A deputada Ánxela Franco destacou que “é fundamental visibilizar a loita das mulleres e a nosa obriga é sumarnos as mobilizacións tamén por todas aquelas mulleres que, pola desigualdade e as condicións que viven, non poderán saír ás rúas e participar con contundencia nas actuacións”.
Defendeu Ánxela Franco que desde a Deputación da Coruña levan “tres anos traballando pola igualade, como unha institución pioneira, con accións en todos os ámbitos e unha actuación transversal”, dixo, destacando programas como os desenvolvidos coa área de cultura como son os Premios Luísa Villalta ou o Begoña Caamaño, o programa en Deportes “Contra os elementos” ou as distintas iniciativas para loitar contra a violencia de xénero, encamiñadas de maneira especial cara o ensino ademáis da elaboración da diagnose de Igualdade que está en curso.
Na presentación da campaña estivo tamén presente a deseñadora da imaxe Patricia Portela de The Office que explicou o seu traballo –que resultou gañador do concurso- apelando ao colectivo xa que, segundo dixo, “o camiño decidímolo nós pero necesitamos que todo o mundo empurre para que o camiño se abra. A campaña quere visibilizar o empoderamento das mulleres como peza fundamental para a igualdade”.
“As mulleres somos as que máis sufrimos cando se recortan as pensións, cando os nosos fillos non teñen emprego… somos a parte máis sensible da sociedade, sufrimos a brecha salarial, a discriminación e os teitos de cristal e é hora de nos erguer e reclamar os nosos dereitos”, sinalou Ánxela Franco da campaña que se fixo hoxe pública.
Sábado, festa 16Mx8M
Na roda de prensa presentouse tamén a gala 16Mx8M que terá lugar o vindeiro sábado día 10 ás 20:30 horas que convocará no Teatro Colón dezaseis mulleres da música como son MJPérez, A Banda da Loba ademais de Mounqup, gañadora do Premio Narf da Deputación da Coruña e “Máis boas cás patacas”, a banda que gañou a categoría xuvenil do premio Quero Cantar coa súa canción “Son muller”. A compañía trasPediante conducirá a gala que é de asistencia gratuíta previa retirada da entrada na web de Ataquilla ou na billeteira do Teatro.
No acto a técnica de Igualdade Eva Ovenza presentou unha nova convocatoria do IX Concurso de Viñetas pola igualdade, Donas.Mulleres na historia de Galicia ao que se poden presentar persoas de entre 12 a 18 anos cunha obra orixinal e inédita en galego sobre a historia das mulleres, biografías femininas galegas, empoderamento feminino, o papel das mulleres na sociedade galega cun máximo de seis viñetas. Departamento de comunicación