GALICIA | POLÍTICA
Tellado: "O Partido Popular debe constituírse como alternativa"
O secretario
xeral dos populares galegos, Miguel Tellado, nunha entrevista concedida hoxe á Cadena Ser, salientou que nestes momentos toca traballar intensamente de
cara as próximas eleccións municipais para conformar proxectos ilusionantes en
todas as cidades: “Naqueles concellos onde hoxe impera a parálise e a
frustración, temos que formularnos como alternativa, de aí que sexa necesario
elixir os mellores candidatos, facer equipos e elaborar proxectos de futuro
para cada un deles”.
O número
dous dos populares galegos indicou que o adversario a bater son “gobernos de
minoría, oportunistas e de perdedores”. Neste senso, referiuse á complicidade
do PSdeG coas Mareas de Podemos, que facilitou gobernos onde non gañaron
eleccións. “Ao final, imos ter que darlles a razón. Prometeron o cambio e,
efectivamente, cumpriron: é o cambio a peor”, sentenciou. “Hai que explicarlle
á xente –engadiu- que Ferrol merécese un futuro mellor, ao igual que A Coruña,
e que Santiago pode recuperar o pulso e volver ser a capital de Galicia”.
“O que
imos reivindicar nas Eleccións Municipais de 2019 son os gobernos de maiorías,
de estabilidade e de colaboración coa Xunta de Galicia”, salientou Miguel
Tellado, que lamentou que o proceso de recuperación económica que está a vivir
España e Galicia, en moitas das cidades nas que gobernan as Mareas non se está
a dar.
Luis Villares "non é voceiro de nada"
Para o
secretario dos populares, Luis Villares “non é voceiro de nada”, ao quedar
acreditado a súa incapacidade para asumir ningunha responsabilidade no episodio
que protagonizou Paula Quinteiro de abuso de poder e de intimidación aos
axentes da Policía Local de Santiago.
Miguel
Tellado fixo fincapé na actitude de Luis Villares, incapaz de dar a cara: “leva
sete días escapando dos medios de comunicación, porque non quere dar
explicacións e non é quen de posicionarse”. “Está a demostrar unha gran debilidade interna e unha
gran falta de liderado”, engadiu, tal e como se puxo de manifesto na decisión
que adoptou o consello das Mareas, contraria á tomada polo grupo parlamentario,
dous órganos que preside Luis Villares. “É unha crise utilizada polos propios
membros de Podemos para socavar e minar o liderado de Luis Villares”, indicou.
"Unha sanidade de primeiro nivel"
Por outra
banda, o secretario xeral dos populares aproveitou para poñer en valor “unha
das mellores sanidades públicas de toda Europa”. E é que, tal e como destacou,
a Xunta de Galicia inviste o 40% do orzamento de cada ano, o que supón arredor
de 4.000 millóns de euros: “Temos unha sanidade de primeiro nivel”, insistiu.
Neste
senso, lamentou que algúns partidos de esquerda danen a súa imaxe co único fin
de acadar réditos políticos: “temos unha sanidade que se constrúe co esforzo de
todos os galegos e galegas. Está ben xestionada e con magníficos profesionais”.
“A oposición minte cando fala de recortes, porque non os hai”, continuou Miguel
Tellado, que recordou que, con respecto a 2009, hai máis gasto sanitario e máis
infraestruturas, polo que “o discurso dos supostos recortes da oposición é
falso".