GALICIA
27 deportistas de alto nivel optan ao programa "Eu son DGAN"
O programa ‘Eu son DGAN’ da Secretaría Xeral para o Deporte, presentado
o pasado 20 de novembro de 2017 e que axuda aos deportistas galegos e galegas
de alto nivel á súa inserción laboral da man da Fundación ONCE, conta, tras o
primeiro trimestre de 2018, con 43 ofertas de traballo activas para as que existen
27 candidatos e candidatas que poderían asinar os primeiros contratos laborais
nas vindeiras datas.
En total, ao abeiro do programa, foron contactadas 96 empresas e un
total de 276 deportistas galegos, o 77% dos deportistas de alto nivel recoñecidos
segundo o procedemento iniciado en xuño de 2017 (358). De todos os deportistas
de alto nivel contactados, o 67% amosa o seu interese por participar no
programa.
A partir de agora, incorporaranse ao programa o resto dos deportistas
así como aqueles que foron recoñecidos a través do último procedemento de
novembro de 2017, xa que na actualidade, Galicia conta con 380 os deportistas
galegos de alto nivel (237 masculinos e 143 femininos). Do mesmo xeito, o
programa xa está a incorporar ás súas entrevistas aos deportistas galegos que
tiveron o recoñecemento de alto nivel vixente nalgún momento da súa
traxectoria, aínda que no momento actual non desfruten desa condición.
Cómpre salientar que nestes tres primeiros meses do ano realizáronse 69
entrevistas iniciais cos deportistas galegos de alto nivel, así como 29
entrevistas de orientación e seguimento presenciais e outras 336 de xeito
telemático.
‘Eu son DGAN’
O programa procurará a integración laboral das e dos deportistas de
alto nivel traballando desde un primeiro momento na compensación das
dificultades que a práctica do deporte de alta competición pode causar na
formación e na integración laboral dos deportistas. ‘Eu son DGAN’ está
destinado a todos os deportistas galegos de alto nivel, que son e que o foron.
O deporte de alto nivel esixe un compromiso férreo cun estilo de vida
baseado no esforzo, no sacrificio, no adestramento diario e na disciplina, polo
que unha parte fundamental do proxecto ‘ Eu son DGAN’ é a
visibilización das persoas deportistas de alto nivel poñendo en valor o
que levan achegando á sociedade durante a súa vida deportiva e destacando as
capacidades adquiridas coa práctica do deporte: compromiso, dedicación,
competitividade, cooperación, traballo en equipo, respecto, logro ou perseveranza.
Capacidades que todo directivo quere ter na súa empresa e que fan dos
deportistas traballadores excepcionais.
Todos os deportistas
de alto nivel reciben, no marco do programa, un kit de presentación composto
polo currículo académico, deportivo, unha carta de recomendación, cartóns de
visita e outros materiais que complementan o seu portfolio para unha maior visibilidade do
programa e maiores expectativas de éxito no contacto coas empresas.
‘Eu son DGAN’ é unha iniciaitva que desenvolve a Xunta de Galicia
da man da Fundación ONCE e as súas entidades de intermediación laboral Ilunion
Empleo e Inserta Empleo.