ESTADIO DE RIAZOR
A Deputación achega un millón de euros para financiar as obras do estadio de Riazor
A Coruña.- O presidente da Deputación da Coruña, Valentín González Formoso, e o alcalde da Coruña, Xulio Ferreiro, asinaron hoxe, na sede da institución provincial, o convenio para o financiamento das obras de reforma e conservación da cuberta e a estrutura metálica das gradas do estadio de Riazor.
Segundo contempla o texto, a achega da Deputación ascenderá a 1 millón de euros, que representa un 14,3% do orzamento total das obras, que ascende a preto de 7 millóns de euros para “unha infraestrutura que é unha referencia deportiva non só na cidade, senón en toda a provincia da Coruña”, afirmou o presidente provincial, Valentín González Formoso, que destacou “a perfecta coordinación entre as dúas institucións para sacar adiante o proxecto en tempo récord, co obxectivo de acometer as obras durante a época estival”.
As finais da Copa Deputación xogaranse en Riazor
Formoso agradeceu a colaboración do Real Club Deportivo da Coruña para facer posibles as contraprestacións polo apoio económico da Deputación. Entre elas, destacou que durante un prazo de 10 anos as finais masculina e feminina da Copa Deputación disputaranse no estadio coruñés, contribuíndo a dar maior visibilidade a un dos torneos máis veteranos do fútbol coruñés.
Asimesmo, poranse a disposición da Deputación 1.000 entradas cada ano para o Trofeo Teresa Herrera, que se distribuirán entre escolas de fútbol base e colectivos desfavorecidos, e emitiranse spots ou vídeos divulgativos da Deputación e dos concellos da provincia da Coruña nos paneis electrónicos do estadio durante as previas e descansos dos partidos.
O presidente provincial enmarcou esta colaboración económica nas múltiples liñas de apoio que, nos ámbitos social, cultural, de igualdade, promoción económica ou mobilidade, a Deputación da Coruña mantén co concello herculino.Pola súa banda, o alcalde Xulio Ferreiro agradeceu “a contribución xenerosa” da Deputación para cofinanciar as obras e destacou que servirán para seguir facendo de Riazor “non só o estadio municipal que é, senón un estadio metropolitano e case provincial”.
Ferreiro, que apuntou que o proxecto foi tamén aprobado hoxe mesmo na Xunta de Goberno Local, incidiu tamén na “coordinación total” ante unha “intervención complexa”, que require comezar as obras ao rematar a Liga para poder telas rematadas antes do comezo da nova tempada. Departamento de comunicación