MALPICA
Malpica acolle os actos en memoria da primeira vítima mortal de ETA
Malpica.- O presidente da Deputación da Coruña, Valentín González Formoso, participou hoxe en Malpica, xunto ao alcalde da localidade, Eduardo Parga, e o presidente da Asociación Pro Guardia Civil (APROGC), Fernando Trejo Ramírez, nos actos en memoria do guardia civil José Antonio Pardines Arcay, primeira vítima mortal da banda terrorista ETA e natural deste municipio coruñés.
Tanto na ofrenda floral realizada no cemiterio malpicán como no posterior acto de inauguración dun monolito na súa memoria na praza do Concello estiveron tamén o irmán do guardia civil, Manuel Pardines, familiares e numerosos amigos e veciños, ademáis dunha ampla representación de membros da Benemérita.
“Hoxe é un día para o recordo. Un día triste e chuvioso para lembrar a memoria deste garda civil veciño de Malpica, que quedará para sempre patente neste monolito de pedra, pero tamén para lembrar a todas e cada unhas das 853 vidas que durante cinco décadas se cobrou a barbarie e o sinsentido de ETA”, afirmou o presidente da Deputación da Coruña no seu discurso.
“Fronte aos que quixeron impor con pistolas as súas ideas, a unidade dos demócratas foi a clave fundamental para derrotar ao terrorismo en España. Despois de cinco décadas, gañou a democracia” sostivo González Formoso, que apuntou que “o mellor que podemos facer polas vítimas é defender a verdade e transmitila ás novas xeracións para que aquelas páxinas negras da historia deste país non se terxivesen, non olviden e non volvan a repetirse nunca máis”, concluíu. Departamento de comunicación