GALICIA
Galicia baixou o seu endebedamento en 201 millóns no segundo trimestre
Galicia baixou medio punto o seu endebedamento público no segundo trimestre do ano, cun descenso de 201 millóns de euros no seu volume global, e sitúase como a quinta comunidade con menos débeda de España, segundo os datos do Banco de España publicados esta mañá.
Ao finalizar o segundo trimestre do ano, a ratio de débeda/PIB de Galicia situouse no 18,6%, cinco décimas por debaixo da rexistrada no primeiro trimestre (19,1%) e catro décimas por debaixo da rexistrada no mesmo período do ano anterior (19,0%). Ademais, o diferencial positivo de Galicia respecto á media autonómica (24,7%) aumenta ata os 6,1 puntos, cando en 2008 estaba igualado á media.
Ademais, a previsión do Goberno galego é que a ratio de endebedamento continúe baixando ata o peche do exercicio, o que confirma que este indicador está totalmente estabilizado en Galicia desde o ano 2014. Isto tamén permitirá cumprir un ano máis o límite de débeda fixado polo Consello de Política Fiscal e Financeira, como vén facendo Galicia ano a ano durante a última década.
En volume absoluto, a débeda das comunidades autónomas situouse ao peche do segundo trimestre en 293.246 millóns, o 3,9% deste importe -11.549 millóns- na comunidade galega. A xestión rigorosa da Xunta ten evitado que Galicia emitise uns 3.800 millóns de euros, xa que Galicia é a comunidade que menos aumentou o seu volume de débeda desde 2008.
Quinta comunidade con menos débeda
Os datos do Banco de España ratifican que Galicia continúa entre as comunidades autónomas de referencia no control do seu endebedamento, froito do control da estabilidade orzamentaria que vén realizando a Xunta. De feito, Galicia é a quinta comunidade con menor ratio de débeda/PIB, a terceira de réxime común, só por detrás de Madrid e Canarias.
O control da débeda pública é unha das bases do modelo de crecemento san que defende a Xunta, e é froito da progresiva redución do déficit que vén acadando o Goberno galego nos últimos anos. Este mellor comportamento respecto da media permitiu a Galicia acadar un importante aforro en xuros da débeda, que neste 2018 será duns 65 millóns de euros.