VIOLENCIA DE XÉNERO NO DEPORTE
En marcha iniciativas para loitar contra a violencia de xénero no deporte
Dentro do Pacto de Estado
contra a Violencia de Xénero, destaca a implicación do deporte
galego. A Vicepresidencia da Xunta asinou este ano un convenio coa Secretaría Xeral
para ou Deporte para levar a cabo distintas campañas de sensibilización
no ámbito deportivo.
Estas accións contan cun investimento para este ano de 1,5 millóns de
euros.
A iniciativa inclúe medidas como campañas en espazos deportivos e
difusión das mesmas a través dos clubs galegos de alta competición, a
dotación de equipamento da campaña NON contra a violencia de xénero
para o colectivo arbitral, así como orzamento para os deportistas
olímpicos que participen en Tokio 2020.
De feito, presentáronse os novos contratos de patrocinio
publicitario cos deportistas da nosa comunidade (clasificados ou en fase de
clasificación) para os Xogos de Tokio 2020.
Ademais nomeouse como embaixadores da loita contra a violencia de xénero ao
triatleta Javier Gómez Noya; o piragüista Cristian Toro; a nadadora
María Vilas; a judoka María Bernabeu, e os regatistas Tamara Echegoyen
e Nicolás Rodríguez. Súmanse ao
compromiso os piragüistas Teresa
Portela, Carlos Arévalo e Rodrigo Germade; o remeiro
Rodrigo Conde; o seteiro Miguel Alvariño; o xogador de tenis de mesa,
Alberto Seoane; Juan Antonio Saavedra -que compite en tiro adaptado- e
Agustín Alejos, xogador de baloncesto en cadeira de
rodas.
Estes deportistas galegos son algúns dos 25 clasificados ou en
fase de clasificación para Tokio 2020, así como
participantes nas edicións anteriores dos Xogos Olímpicos e Paralímpicos,
que asinarán contratos de patrocinio. Os deportistas deberán incorporar nos seus
equipamentos oficiais de competición e de adestramento os logotipos da
campaña NON contra a violencia de xénero. Ademais, terán que difundir a través das súas redes sociais polo menos
unha publicación mensual relacionada coa loita pola tolerancia e contra a
violencia de xénero. Todos estes deportistas son referentes e ídolos de moitos mozos.
Contratos de patrocinio: 1,5 millóns de euros
Por iso, esta colaboración é fundamental co obxectivo de
educar na igualdade e na loita contra a violencia machista.
Estes contratos de patrocinio intégranse no convenio de colaboración no
marco do Pacto de Estado contra a Violencia de Xénero en materia de
deportes dotado con 1,5 millóns de euros.
A Xunta de Galicia vén apostando nos últimos anos por impulsar a
igualdade no ámbito deportivo.
O Goberno conta xa con varias liñas de
actuación nesta area como charlas en centros educativos coa Fundación Vero
Boquete, ou a colaboración coa Federación de Fútbol para impulsar a
igualdade no fútbol profesional e afeccionado. Ademais, tamén se
chegaron a acordos coas federacións de balonmán ou baloncesto.