SANTIAGO | ATENEO
Primeiro concerto do Festival Ateneo Barroco dedicado ás sonatas para violín e clave de Bach
Primeiro
dos 5 concertos que ao longo desta semana encherán a oferta do novo Festival
Ateneo Barroco. O Paraninfo da Universidade (Facultade de Xeografía e Historia)
acolle o martes (20:00 horas) o recital protagonizado polo violinista
Massimo Spadano e o clavecinista Fernando López Pan e dedicado ao gran Johann
Sebastian Bach, un dos protagonistas principais desta primeira edición do
festival que conta co patrocinio do programa O teu Xacobeo da Xunta de Galicia,
da Deputación da Coruña e do Concello de Santiago e a colaboración da
Universidade de Santiago.
Dende
A Coruña chegan dous músicos especialistas na música do Barroco e profundos
coñecedores do repertorio desta época e especialmente dunha das grandes figuras
deste período, Johann Sebastian Bach. Massimo Spadano, violinista-concertino da
Orquestra Sinfónica de Galicia, e Fernando López Pan, clavecinista e profesor
deste instrumento no conservatorio de música coruñés, interpretarán 3 das 6
sonatas que Bach escribiu para os seus instrumentos, violín e clave.
O programa
complétao outra sonata para o mesmo tipo de dúo composta por outra das máis
senlleiras figuras do Barroco, o compositor de orixe alemá nacionalizado inglés,
Georg Friedrich Haendel.
As
entradas para o concerto poden adquirirse en entradas.ataquilla.com, na sede de
Afundación na rúa do Vilar e, 2 horas antes do concerto, no mesmo Paraninfo da
Universidade.
No
espazo de celebración de cada concerto, e con anterioridade ao mesmo (18:30 horas),
celebraranse durante os cinco días de concerto do festival, uns breves
encontros cos artistas, dispostos a satisfacer dúbidas e curiosidades e a
ilustrar e amosar as peculiaridades dos seus instrumentos, todos tan vencellados
ao Barroco como neste caso é o clave, instrumento do que poderemos descubrir
moito da man dun especialista amante deste instrumento como é Fernando López
Pan. Esta actividade é gratuíta con acceso limitado por rigorosa orde de
chegada a 25 persoas. Departamento de comunicación