DEPUTACIÓN DA CORUÑA
O artista Mauro Trastoy gaña o Premio Díaz Pardo da Deputación
A CORUÑA | O artista Mauro Trastoy (Ferrol, 1971) coa súa obra
titulada "7" é a gañadora do XVI certame Isaac Díaz Pardo de artes
plásticas da Deputación da Coruña. A obra está elaborada a punto de cruz con lá
sobre arpilleira branca. Un xurado composto por Silvia García González, Alberto
González-Alegre, David Barro, Almudena Fernández e Manuel Eirís -gañador da
edición anterior- escolleu por unanimidade a obra do artista Mauro Trastoy de
entre as vinte finalistas que foran seleccionadas do total das presentadas a
esta nova convocatoria do Premio Díaz Pardo de Artes Plásticas da Deputación da
Coruña.
O xurado valorou a calidade da obra presentada e
titulada "7" e, de maneira
especial, como esta é resultado dunha
singular investigación e experimentación con técnicas relacionadas coa trama e
a urda e o quefacer artesanal para facer unha pintura sen pintura, a partir de
xestos mínimos e unha incidencia no proceso e na repetición do motivo. A obra,
de lá branca sobre arpilleira branca, "consigue renovar a tradición da
pintura reivindicando ao mesmo tempo as nosas tradicións artesanais".
O artista natural de Ferrol, recibirá un premio de
6.500 euros e a súa obra participará xunto coas finalistas na exposición itinerante
organizada pola Deputación da Coruña que visitará dez concellos da provincia.
Ademais, a Deputación da Coruña destina nesta convocatoria un orzamento dun
total de 25.000 euros para a compra de obras seleccionadas.
Mauro Trastoy é un dos nomes máis recoñecidos da
arte contemporánea galega e a súa obra expúxose en distintas mostras
individuais e colectivas. Artista e deseñador gráfico, coa súa obra cuestiona
as fronteiras entre arte, artesanía e deseño. Nos últimos tempos, un dos
principais ámbitos de traballo de Trastoy céntrase no contacto e a
experimentación cos propios materiais. Licenciado en Belas Artes pola Universidade de Salamanca,
o artista participou nunha estadía en Künsthochshule de Kassel e no
Kulturmodell de Alemaña, ademais de ser artista en residencia da Fundación
Granell. Departamento de comunicación