GALICIA | O TEMPO
A Xunta activa a alerta laranxa por temporal costeiro nas provincias da Coruña e Lugo
A Dirección Xeral de Emerxencias e Interior da Vicepresidencia da
Xunta activa a alerta laranxa por temporal costeiro nas provincias da
Coruña e Lugo.
Segundo informa a Axencia Estatal de Meteoroloxía
(AEMET), o fenómeno meteorolóxico adverso costeiro de nivel laranxa
afectará ao noroeste da provincia da Coruña e a todo o litoral de Lugo a
partir das 15 horas de hoxe con ventos do oeste de forza 8 e mar
combinada do noroeste con ondas entre 5-6 metros. No resto do litoral
galego haberá alerta amarela. Ademais, actívase nivel amarelo por vento
con rachas que poden acadar os 80 km/h e alerta amarela por choiva que
afectará a toda a comunidade galega.
Por este motivo, e co fin de
garantir a seguridade dos bens e as persoas, a Dirección Xeral de
Emerxencias e Interior, a través do Centro de Atención ás Emerxencias
112 Galicia, informou da situación aos concellos da provincias
afectadas; deputacións, servizos provinciais e agrupacións de
voluntarios de Protección Civil e aos clubs náuticos, entre outros.
Deste xeito, agárdase que se adopten as medidas oportunas para garantir a
seguridade dos bens e das persoas.
Debido ao temporal costeiro,
recoméndase permanecer lonxe da liña de costa e das praias e paseos
marítimos co fin de previr un eventual golpe de mar que poida arrastrar
persoas ou obxectos. É preciso evitar aproximarse a diques, rompentes,
espigóns, peiraos e todas aquelas zonas que poidan ser varridas polo mar
e vixiar posibles caídas de obxectos de balcóns e fiestras.