DEPUTACIÓN DA CORUÑA
O pleno da Deputación dá luz verde á derradeira achega do Plan Único 2019: 17,1 millóns para 158 obras
A CORUÑA | A Deputación da Coruña aprobou hoxe, por
unanimidade de todas as forzas políticas, a derradeira achega do Plan Único
deste ano (POS+2019) por un importe total de 17,1 millóns de euros, dos que
16.245.962 € corresponden a fondos provinciais e 908.460 serán aportados polos
concellos.
Coa achega aprobada hoxe, o POS+ da Deputación puxo a disposición dos
concellos coruñeses durante 2019 un total de 100.484.818 euros, superando o
investimento realizado nos exercicios anteriores. Un total de 83 concellos coruñeses beneficiaranse desta achega
adicional do Plan, que permitirá executar un total de 158 obras de mellora de
infraestruturas municipais. Pavimentacións de camiños e núcleos rurais, obras
de saneamento e abastecemento de auga, dotación de mobiliario urbano, creación
de parques públicos e infantís ou creación de infraestruturas deportivas son
algunhas das obras que se realizarán nos concellos co apoio do Plan Único.
Entre as obras destacan polo investimento obras coma as gradas e
vestiarios do campo de fútbol de Brexo, en Cambre (657.218,29 euros), a
construción dunha pista de patinaxe en Bastiagueiro-Oleiros (430.419,71 euros),
urbanización da avenida Manuel Fraga de A Laracha (244.451,96 euros), dotación
de novo césped artificial ao campo de fútbol de O Viso (Arzúa), cuberta e
iluminación do parque infantil de Boiro (247.740 euros) ou construción dun novo
parque na Corveira-Culleredo (446.812 euros). Departamento de comunicación