DEPUTACIÓN DA CORUÑA
A Deputación defende a promoción do galego na infancia coa colaboración con Correlingua
A CORUÑA | Apoiar e promover o uso do galego nas xente máis
nova, apoiar iniciativas que animen a usar a nosa lingua en nenas e nenos e
contribuír á eliminación da ruptura xeracional son algúns dos obxectivos da
Deputación da Coruña con respecto á normalización da lingua galega que se plasman
en distintas liñas de actuación como o apoio ao Correlingua que hoxe se selou
na sede institucional.
A deputada responsábel da área de Lingua, María
Muíño, e o presidente de Correlingua, Anxo Terán, asinaron este martes na
Deputación da Coruña o convenio de colaboración polo que a institución
compromete o seu apoio ás carreiras polo idioma que cada ano se desenvolven en
todo o país e, concretamente, nos concellos de A Coruña, Santiago de Compostela
e Narón que foron as celebradas na pasada edición dentro do territorio da
provincia da Coruña.
Con este obxectivo, a Deputación da Coruña destina
un total de 20.000 euros para apoiar a organización de actividades que se
desenvolven arredor das carreiras encamiñadas á normalización lingüística. "Desde a Deputación da Coruña apoiamos
iniciativas que, como o Correlingua, contribúen a defender o dereito de medrar
en galego, a animar ás novas xeracións ao uso da nosa lingua e a mostrar de
maneira enérxica a sorte de contar cunha lingua propia que ", explicou a
deputada María Muíño que urxiu a necesidade de que todas as institucións se
comprometan de maneira decidida á hora de atallar "a alarmante diminución do uso do galego na
infancia".
Ademais das carreiras pola lingua, o proxecto de
Correlingua inclúe a organización de concurso escolares, concursos musicais e
difusión con distintos soportes da animación a usar a nosa lingua. Departamento de comunicación