POLÍTICA | EU
Eva Solla: "O PP incumpriu a promesa electoral de Lei de Emprego para Galicia"
Eva Solla ofreceu hoxe unha
rolda de prensa en Compostela na que destacou as propostas en materia
de emprego e contra a precariedade
laboral que dende Esquerda Unida estamos a traballar. A coordinadora
nacional lembrou, nada máis comezar a rolda de prensa, que “dende esta
organización queremos tratar unha
prioridade: a situación do emprego do noso país” e, para iso, esta mañá presentamos unhas medidas e
propostas que estamos a traballar para elaborar unha Lei de Emprego para
Galicia.
Para Esquerda Unida o
desemprego é a principal prioridade sobre a que actuar, xa que é “o principal
problema para os galegos, seguido da precariedade laboral,” polo que
os problemas de índole económica e relacionados co emprego supoñen unha das
principais preocupacións na nosa sociedade. “Dende decembro estamos a traballar nas propostas do programa e este
traballo estará incluído nun acordo de coalición que estamos a traballar”, dixo
a coordinadora nacional de Esquerda Unida.
Solla lembrou que a “última década de Goberno de Feijóo ten un balance
totalmente negativo en materia de emprego, dando como resultado a perda de máis
de 50.000 postos de traballo en dez anos”, apuntou. Nestes últimos anos, a
cifra resulta aínda máis alarmante “se temos en conta a caída do 40% do emprego
xuvenil, que mostra a falta de oportunidades para a xente moza, ou a baixa
porcentaxe de incorporación ao mercado laboral dos maiores de 45 anos”, lembrou.
Xerar emprego de
calidade e reducir o paro debe ser o eixo sobre o que traballar e, para iso, Solla
recalcou varias propostas que pasan por: “a recuperación do emprego público, o
fomento das actividades vinculadas a un cambio de modelo produtivo e de
transición enerxética e as actividades vinculadas ao tecido industrial e
sectores primarios”, a través de estas ideas Solla anunciou a
proposta dunha Lei de Emprego para Galicia. “O PP incumpriu a promesa
electoral de Lei de Emprego para Galicia. Hoxe trasladamos que estamos a
traballar nunha Lei
de Emprego para mellorar a vida das persoas e que estará no noso
programa”.
O primeiro punto desta
Lei de Emprego que estamos a elaborar é a
reforma ou modificación do Servizo Público de Emprego. “Queremos que o Servizo
Público de Emprego no noso país sexa un verdadeiro axente de busca activa de
emprego e de orientación, para iso, consideramos necesario incrementar o
persoal público. A mellora na formación para emprego, a orientación para busca
de emprego e servir de ponte para que as empresas usen este servizo para buscar
o persoal que precisa son tres cuestións prioritarias para desenvolver”,
explicou.
Outros colectivos aos
que se dirixe esta lei son “á xente moza
e, doutra banda, a xente que tivo que emigrar para conseguir un posto de
traballo, ese capital humano que é fundamental para nutrir a man de obra dos
sectores da nosa industria, evitando o peche de empresas estratéxicas”.
Segundo sinalou Solla,
o Servizo de Emprego ten “importantes carencias” que fan que atopar emprego
sexa moi complicado para “desempregados de longa duración ou a mocidade”, por
exemplo. O actual modelo tampouco é o máis axeitado para rematar coa precariedade
asentada e coas e cos traballadores pobres, por iso precisamos axudas e plans de emprego específicos para
colectivos que vaian vinculadas ao mantemento de emprego de calidade e a longo
prazo.
Outro dos piares desta
lei centrase no “aumento de recursos
para o Instituto Galego de Seguridade e Saúde Laboral”, xa que a inspección
debe mellorar no referido a tres elementos: redución de sinistralidade laboral
por medio de máis inspeccións (Galicia segue a ser unha das comunidades con
maior sinistralidade); medidas para rematar coa fraude na contratación e, por
último, rematar coa fenda salarial por motivos de xénero. Por todo isto,
dende Esquerda Unida traballaremos con estas propostas en materia de emprego
para atallar a situación grave de desemprego e precariedade que sofre o noso
país. Departamento de comunicación