Política Lingüística promove o uso do galego entre pais e fillos cunha campaña que comeza no embarazo

A práctica totalidade dos nenos entre 5 e 9 anos enténdeno e saben falalo

A secretaria xeral de Política Lingüítica, Marisol López, presentou en Santiago "Xeración e Logo!", unha campaña coa que a Xunta quere promover o uso do galego entre os pais e os seus cativos, gañando terreo deste xeito na recuperación da transmisión familiar da lingua con actividades que se pretende que comecen xa co embarazo. Para facilitar o labor, o Servizo Galego de Saúde (Sergas) distribuirá na súa rede hospitalaria materiais diversos que chegarán a máis de 15.000 familias. Trátase de información, consellos, un pequeño caderno de embarazo, recitativos para o bebé e un disco con cantos de berce interpretados por músicos galegos. Marisol López explicou que os materiais presentados destínanse a dúas xeracións que teñen na súa man que non se produza en Galicia unha fractura na transmisión da lingua. Segundo os datos do seu departamento, a maioría das familias de Galicia segue transmitindo o galego na casa, aínda que cada vez máis xunto co castelán. De feito, o 62% dos galegos entre 15 e 54 anos teñen o galego como lingua inicial. Ademais, maioritariamente, a lingua inicial é o galego. Non obstante, nas franxas de 26 a 35 anos o castelán pasa a ser lingua maioritaria, se ben, ese retroceso do galego nos máis novos estase a estabilizar. O grupo máis numeroso actualmente é o dos bilingües iniciais, que constitúe o 41% dos galegos entre 15 e 45 anos, mentres que, prácticamente, a totalidade dos nenos de entre 5 e 9 anos entenden e saben falar en galego. Galego no embarazo A titular de Política Lingüística destacou na presentación que falarlle galego a un fillo que vai nacer en Galicia é situalo no contorno natural no que vai medrar e axudalo a entender mellor a realidade que o rodea. Engadiu que lle permite tamén levar naturalmente a súa cultura e ofrécelle unha oportunidade para garantir que o fale ben cando xa constrúa as súas frases, sen olvidar que "contribuirá á súa plena integración na sociedade", dixo. Cantar de arrolo Á presentación, ademais do director xeral de Asistencia Sanitaria do Sergas, Julio Villar, acudiron diversas embarazadas, que tiveron a oportunidade de escoitar un dos cantares de berce para arrolar aos nenos que se inclúen no CD destinado a elas. Interpretouno Xabier Díaz, acompañado polos músicos Guillermo Fernández e Suso Iglesias. No disco compacto participan outros artistas galegos como Espido, Mercedes Peón, Luar na Lubre e Uxía. Ao peche, a escritora pontevedresa Fina Casalderrei leu unha carta preparada por ela para a ocasión na que lle da os parabéns ás nais e que tamén se inclúe na carpeta-maletín que recibirán as mulleres en estado de xestación como ferramenta para avanzar na transmisión familiar do galego.