A compañía de danza Pisando Ovos estrea este sábado "30.000", unha reflexión sobre o diñeiro

Unha subvención de 30.000 euros para desenvolver o seu proxecto foi o xerme da peza de danza que a compañía Pisando Ovos estrea o sábado no Salón Teatro de Santiago, en co produción do Centro Coreográfico Galego. Tanto é así que decidiron titulalo '30.000' e converter o diñeiro no tema da súa cuarta obra. Baixo a dirección de Damián Muñoz, Rut Balbís e David Loira interpretarán o sábado ás 20.30 horas e o domingo ás 18 horas unha creación que reflexiona sobre o papel do diñeiro na sociedade actual. "Cando recibimos o diñeiro, empezamos a pensar que cousas traía o diñeiro, que cambiaba en nós, que importa á xente na sociedade capitalista: a sexualidade, a aparencia...", explica o bailarín. O propósito destes dous mozos é "deixar algo na xente, que vaian a casa con algo que pensar, á parte de ver formas e movementos". O Instituto Galego de Artes Escénicas e Musicais (Igaem) apoiou á compañía nun proceso que durou nove meses. A axuda consistiu nunha residencia artística en Oleiros, apoio en investigación e formación, unha residencia técnica na Sala Galán e no Salón Teatro durante a última semana, segundo expuxo a coordinadora da unidade de danza do Igaem, Natalia Balseiro. Trátase da segunda co produción do Centro Coreográfico Galego, trala estrea do espectáculo 'Arte a escena', de ExperimentaDanza. Para a nova compañía, fundada hai tres anos por dous novos artistas, esta posibilidade que lle brinda o Igaem permítelles "traballar todos os días na danza, polo que melloramos moito a nivel físico, profundizamos na relación e en nós como bailaríns e ofrecemos un espectáculo máis maduro", di Loira. A directora do Centro Dramático Galego, Cristina Domínguez, manifestou hoxe durante a presentación do espectáculo que a danza "é un dos puntos nos que máis hai que traballar agora Malia a súa curta traxectoria, Pisando Ovos ten participado en festivais de danza de Galicia, como o Festival Urbán da Coruña, o Festival Isto Ferve de Vigo ou o En pé de pedra de Santiago, así como en festivais do resto de España, como o Festival de Dansa de Valencia, o Mes de Danza de Sevilla, o Cádiz en Danza ou o Escena Contemporánea de Madrid. Recentemente actuaron na capital de Ghana convidados pola embaixada española no país africano.