GALICIA | POLÍTICA
Gonzalo Caballero: "Queremos unha Galicia enmarcada no proxecto europeo"
SANTIAGO DE COMPOSTELA | O secretario xeral do PSdeG, Gonzalo Caballero, mantivo hoxe unha
xuntanza co eurodeputado socialista Nicolás González Casares para amosar
o compromiso europeísta do socialismo galego e abordar a xestión dos
fondos europeos ante o reto da modernización de Galicia.
Neste
marco, o máximo dirixente do PSdeG pediu a Feijóo “que se reúna” cos
líderes dos grupos parlamentarios para abordar as prioridades e xestión
dos fondos Next Generation. Así, chamou a levar a cabo un “gran acordo
de país” que permita unha “utilización eficiente, capaz e solidaria para
que os fondos europeos sexan a enerxía renovable que impulse a
modernización e o futuro do noso país”.
“O goberno da
Xunta foi incapaz de conseguir acordos e establecer as prioridades da
utilización dos fondos europeos”, censurou Gonzalo Caballero despois de
lembrar que, ao principio, Feijóo “dixo que tiña 7 proxectos
importantes, que logo eran 106 e despois 354”, o que pon de manifesto
unha “política desnortada, sen rumbo, sen estratexia”.
Así,
Gonzalo Caballero censurou unha política de “brazos caídos”, baseada na
“inercia” e na “inacción”, con falla de ambición e “sen medidas nin
estratexia” para facer fronte aos retos do futuro. “En
Galicia temos que facer ben os deberes”, reivindicou o máximo dirixente
das e dos socialistas galegos, logo de incidir en que “Europa está
mobilizando unha inxente cantidade de fondos públicos que as
administracións poden dedicar á modernización, cohesión e aos retos da
dobre transición ecolóxica e dixital”. “Galicia non pode perder a
oportunidade dun aproveitamento solidario e eficiente dos fondos
europeos”, subliñou.
Fronte a isto, o responsable
socialista lembrou que o último informe do Consello de Contas da Xunta
sinalou que, nos últimos anos, “houbo unha baixa execución dos fondos
europeos”, xa que a Xunta “non executou 4 de cada 10 euros” que chegaron
de Europa, o cal cualificou como “un balance negativo”.
O eixe europeísta da ponencia marco do PSdeG
Neste
marco, o líder do PSdeG reivindicou o “galeguismo europeísta” do PSdeG.
“Os socialistas galegos temos unha clara vocación europeísta”, destacou
Gonzalo Caballero ao sinalar que galeguismo e europeísmo son “dúas caras do PSdeG” ao
entender “a defensa dos intereses de Galicia cunha vocación cosmopolita”
e “recollendo de Europa as mellores tradicións, ideas e compromisos coa
xustiza social e coa solidariedade”.
Ao fío disto, o
dirixente socialista comunicou que o eurodeputado Nicolás González
Casares será ponente do eixe europeísta da ponencia marco do próximo
Congreso do PSdeG para “traballar sobre o papel de Galicia en Europa e
tamén no mundo”. “Queremos unha Galicia enmarcada no
proxecto europeo”, reivindicou Gonzalo Caballero, “no que as persoas e a
cidadanía estean á fronte dos intereses de todas as políticas públicas
dende Bruxelas a Santiago pasando por Madrid, dende todos os niveis de
goberno”.
Nicolás González
Pola
súa banda, o eurodeputado socialista Nicolás González Casares amosou o
seu agradecemento ao secretario xeral logo de que este lle encargase o
eixe da ponencia do partido “para conectar Galicia con Europa”. “Europa
acaba de demostrar que é un escudo protector da cidadanía” nun tempo no
que “hai que reducir desigualdades”, destacou o responsable socialista
quen chamou a crear unha Galicia “conectada con Europa” e máis cando “a
Xunta non se está enganchando ás novas transicións ecolóxicas e
dixitais”. “Galicia debe confiar en Europa porque Europa confía en
Galicia”, sentenciou.
Por último, lamentou que a
estratexia de Feijóo estea baseada na “confrontación, non só co goberno
de España, senón incluso con Europa” logo de lembrar as críticas á
estratexia de vacinación por parte do goberno galego. Departamento de comunicación