PARLAMENTO DE GALICIA
Valentín Formoso reclama un novo modelo de financiamento para as numerosas competencias que a Xunta deriva a deputacións e concellos
SANTIAGO DE COMPOSTELA | O presidente da Deputación da Coruña, Valentín González
Formoso, compareceu hoxe ante a Comisión de Economía, Facenda e Orzamentos
do Parlamento de Galicia para presentar as liñas principais do orzamento da
institución provincial para o exercicio 2022, nos que a aposta pola
reactivación económica da provincia, a creación de emprego, a loita contra o
despoboamento do rural e o reforzo dos programas de protección social serán
sendo eixes fundamentais da acción do Goberno provincial que preside.
González Formoso anunciou que o proxecto de orzamento da
Deputación da Coruña para o vindeiro ano, que será sometido á aprobación do
pleno o vindeiro 26 de novembro, ascenderá a 189.235.00 euros, o que supón un
incremento do 2,57 % sobre o do presente exercicio e destacou que, un ano máis,
todos os investimentos e plans da Deputación financiaranse con recursos
propios, sen apelación ao crédito, mantendo a actual situación de “débeda cero”
da institución provincial.
Melloras no financiamento e autonomía dos entes locais
No ano en que se cumpre o 40 aniversario do Estatuto de
Autonomía de Galicia, González Formoso reclamou “a actualización” do mesmo para
reforzar, no seu artigo 49, “a autonomía local cun compromiso directo e
vinculante de achega de recursos aos gobernos locais” que xa recollen os
estatutos de autonomía doutras comunidades autónomas coma a valenciana,
Andalucía, Cataluña, Aragón ou Extremadura.
Formoso defendeu a necesidade de dotar ás administración
locais de recursos económicos suficientes para “atender adecuadamente as
numerosas competencias que a normativa autonómica lles atribúe” e avogou por
“racionalizar, sistematizar e describir axeitadamente as competencias que a
Xunta de Galicia deriva a concellos e deputacións “de forma dispersa e sen
financiamento”.
Valentín González Formoso volveu a incidir na necesidade
de que o Fondo Galego de Cooperación Local recolla unha asignación específica
dirixida ás deputacións para dar cumprimento ao establecido no artigo 142 da
Constitución española e para garantir a adecuada prestación de servizos
públicos “atribuidos ás deputacións e concellos sen financiamento autonómico
suficiente”, coma a extinción de incendios, os servizos sociais, protección
animal, recollida e tratamento de lixo, subministro de depuración de augas,
servizo de protección civil, etc.
“Os obxectivos indicados deberían abordarse adecuadamente
a través dun novo Pacto Local de Galicia que actualice a relación de
competencias, que concrete as condicións óptimas de prestación e financiamento
dos servizos públicos desde un acordo amplo de todas as formacións políticas”,
afirmou o presidente provincial.
Cogobernanza e “participación activa” dos entes locais
nos fondos Next Generation
O presidente da Deputación da Coruña afirmou que “a
experiencia acumulada” durante a pandemia e as “adversas consecuencias
socioeconómicas” que acarreou “evidenciou a necesidade dunha maior maior e
mellor coordinación entre administracións, que fai necesario que camiñemos cara
un novo modelo de cogobernanza para abordar a recuperación; unha nova forma de
facer política máis horizontal que vertical, mais participativa que xerárquica”
que require “da implicación dunha pluralidade de actores públicos e privados”.
Neste sentido, subliñou que esta nova forma de cogoberno
“debe ter o seu reflexo inmediato na redifinición do papel das entidades locais
nos fondos de recuperación que chegarán de Europa”.
O presidente da Deputación reclamou a “participación
activa” dos entes locais na definición, destino e execución dos fondos europeos
de recuperación Next Generation para contribuir a alcanzar os obxectivos
plasmados no Plan de Plan de Recuperación, Transformación e Resiliencia do
Goberno de España.
Valentín González Formoso anunciou que os Orzamentos 2022
contemplan a creación dunha oficina de apoio e asistencia técnica para a planificación
e xestión de iniciativas e programas a desenvolver pola propia Deputación e os
concellos coruñeses no marco deste plan.
74,8
millóns de investimento en plans provinciais
Valentín González Formoso detallou que a Deputación da
Coruña destinará en 2022 74.837.250 euros aos distintos plans provinciais,
entre os que destaca, un ano máis, o Plan Único (POS+2022) que contará cunha
dotación orzamentaria inicial de 47,4 millóns de euros para financiar obras e
servizos públicos nos 93 concellos coruñeses, unha cantidade que, como todos os
anos, irá incremetándose progresivamente coa incorporación de remanentes ao
longo do exercicio.
“O Plan Único da Deputación da Coruña transferiu este ano
90 millóns de euros aos municipios coruñeses, o que o refrenda coma o maior
plan de obras e servizos das catro deputacións galegas e un dos principais de
todo o Estado español”, afirmou. Lembrou
ademáis que o Plan Único favorece a autonomía local deixando que sexan os
propios municipios os que decidan cales son as súas prioridades á hora de
investir os fondos que lles achega a Deputación.
Neste punto, Formoso instou á Xunta de Galicia a aplicar
tamén “criterios obxectivos, transparentes e consesuados” para a asignación de
fondos ás entidades locais, tal como vén facendo a Deputación da Coruña desde a
creación do Plan Único.
Asemade, destacou que Plan Único adquiriu durante a
pandemia “unha nova dimensión social para dar resposta ás necesidades dos
concellos e da cidadanía, reforzando os programas de protección social dos
concellos para non deixar a ninguén atrás na saída da crise”.
Neste sentido, destacou a vocación de permanencia desa
dimensión social do ao anunciar que o POS+2022 continuará ese camiño cunha
partida específica de 7 millóns de euros para gastos sociais coa que os
municipios da provincia poderán continuar financiando cuestións prioritarias no
eido social coma a ampliación dos Servizos de Axuda no Fogar, programas de
respiro familiar e conciliación familiar e laboral, ou axudas directas ás
familias máis vulnerables que están sufrindo especialmente os efectos da crise.
Outros plans provinciais importantes durante o vindeiro
ano serán os 14,6 millóns de euros destinados a investimentos, conservación e
construción de sendas peonís e travesías urbanas nos máis de 2.100 quilómetros
da rede provincial de estradas ou o incremento orzamentario que, un ano máis, a
Deputación destinará ao Plan de Emprego Local (PEL), que este ano alcanza os
12,6 millóns de orzamento inicial (+26%), o que demostra que a aposta pola
creación de emprego e o apoio ao emprendemento seguirá a ser un dos obxectivos
principais do Goberno provincial.
O presidente datallou polo miúdo algúns dos resultados do
PEL, que incluiron o apoio directo á contratación de 4.422 persoas na provincia
da Coruña, 12.520 axudas ao emprendemento e subvencións a autónomos e
microempresas concedidas e máis 230 persoas formadas para mellorar a súa
empregabilidade. En algo máis dun ano e medio, a Deputación da Coruña destinou
25 millóns de euros en axudas directas aos sectores máis afectados pola
pandemial.
Segundo explicou o presidente, no orzamento de 2022
“refórzarase a promoción económica dos sectores primarios coma a agricultura, a
gandería ou a pesca” e incrementaranse tamén os recursos destinados a “áreas
prioritarias e preferentes” coma Benestar Social, Igualdade ou a Rede Cultural.
A aposta por un novo modelo de mobilidade sustentable
será outra das claves da acción do Goberno provincial no vindeiro ano co avance
de importantes proxectos xa en marcha e que contan con financiamento europeo
coma a Vía Verde Santiago-Cerceda ou a ampliación da Rede Ciclista
Metropolitana da Coruña. Departamento de comunicación