FESTIVAL INTERNACIONAL REBULIR
Ramirás engalánase con folclores do mundo
RAMIRÁS | Por décimo sexto ano consecutivo, a cultura, historia e tradición,
chegados dende diferentes puntos do planeta e representados en forma de
folclore sobre o escenario, chegan ao concello ourensán de Ramirás da
man do Festival Internacional Rebulir (FIR). Convértese novamente no
berce do certame que avoga dende os seus inicios no 2005 por achegar
mostras dos pobos a todos os públicos, cunha gala central o próximo
sábado 18 no polideportivo de O Picouto, no mesmo concello.
O FIR, organizado pola Asociación Cultural Rebulir, co apoio
institucional da Xunta de Galicia -a través da Consellería de Cultura,
Educación e Universidade; a Secretaría Xeral de Cultura; a Secretaría
Xeral de Política Lingüística; a Secretaría Xeral de Emigración; a
Dirección Xeral de Xuventude, Participación e Voluntariado e a Dirección
Xeral de Comercio e Consumo, a través da marca Galicia Calidade; o
Parlamento de Galicia, o Consello da Cultura Galega, a Deputación de
Ourense, INORDE, Concello de Ramirás, Concello de Celanova e as
Universidades de Vigo e Santiago de Compostela, foi presentado e
inaugurado esta mañá no Centro Cultural Marcos Valcárcel. Ao acto
asistiron o vicepresidente da Deputación, Rosendo Fernández; a
presidenta do Consello da Cultura Galega, Rosario Álvarez; a
coordinadora territorial de Cultura, Educación e Universidade da Xunta de Galicia, Sandra Quintas; a alcaldesa do
Concello de Ramirás, Isabel Gil; e o director artístico do FIR2021,
Alexandre Sotelino.
Como cada ano, o certame folclórico conta
cunha programación moi ampla e para todos os públicos, coma obradoiros,
concertos e actividades na rúa. Pola súa parte, e como prato forte, a
gala central do FIR, prevista para as 19,00 horas deste sábado, acollerá
as actuacións de cinco agrupacións, entre elas o colectivo anfitrión
Rebulir. Subirán ás táboas do escenario o grupo Quitus, representando a
Ecuador; Tangra, facendo o mesmo con Bulgaria; o grupo folclórico de
Cacia, de Portugal; e Mayalde, de Salamanca. Asemade, esta décimo sexta
edición do certame será conducida polo polifacético artista Pulpiño
Viascón.
Nesta gala central, entregaranse tamén os galardóns aos Premios
Rebulir da Cultura Galega 2021: na categoría musical a Xabier Díaz, un
recoñecemento no eido da música tradicional, tanto dentro como fóra de
Galicia; ao Xabarín Club no eido das artes escénicas, pola súa
contribución á normalización lingüística e á difusión da cultura galega;
e na cateogoría homenaxe, polo seu arraigo á literatura galega e pola
súa vinculación con Ramirás e Celanova, ao presidente da Fundación
Rosalía de Castro, Anxo Nogueira. A mención de honra será para os
emigrantes retornados na comarca de Celanova, pola súa aportación e
implicación co festival dende os seus inicios.
Alexandre Sotelino
No acto de presentación, o director artístico do FIR2021,
Alexandre Sotelino, salientou a “insistencia do colectivo Rebulir para
loitar contra as adversidades e se nos presentan e a resistencia a non
deixar de facelo e negarnos a cancelalo”. Referíndose ás medidas
adoptadas e derivadas da Covid-19, insistiu en que se tratará dun
festival seguro, “poñendo en marcha protocolos extraordinarios, incluso
por riba do que nos solicita a normativa”. Deste xeito, todas as
actividades contempladas no programa do Festival verán os seus aforos
reducidos ao 60%, podendo deste xeito garantir a distancia de seguridade
entre individuos e grupos. Ademáis da ventilación e medidores de
componentes no aire, a organización do FIR2021 ten invertido gran parte do seu presuposto en deceas de probas de detección da Covid-19. Neste
campo, indicou Sotelino, “toda a organización, o corpo técnico e o
elenco de artistas, estarán sometidos a un test diario durante os catro
días dun festival no que a convivencia é a raíña, pero con seguridades e
cautela para todos”.
En canto ás novidades que presenta o
certame respecto das edicións anteriores, o director artístico fixo
fincapé nun programa máis amplo, máis diverso e máis inclusivo: “poñemos
sobre a mesa máis actividades, dun rango de índole más extenso e para
todos os públicos, dende bebés ata anciáns”. Neste marco, destacou a
foliada itinerante prevista para mañá venres polas rúas de Celanova, que
levará ás prazas rúas e corredoiras da capital da comarca actuacións e
actividades simultáneas.
A gala central do sábado, e por primeira
vez, o festival contará con dous escenarios dentro do polideportivo de O
Picouto para alternar as intervencións das agrupacións participantes,
obtendo unha gala “máis dinámica, rápida e curta, con transicións
lúdicas e entretidas para o espectador”, finalizou Sotelino.
Rosendo Fernández
Abirndo
a quenda de intervencións na mesa de presentación do Centro Cultural
Marcos Valcárcel, o vicepresidente da Deputación de Ourense, Rosendo
Fernández, destacou a labor do colectivo Rebulir en prol de achegar aos
veciños deste “pequeno gran municipio unha gran variedade de
manifestacións etnográficas e folclóricas para aprender das mesmas”.
Fernández fixo tamén fincapé na implicación das institucións e dos
diferentes sectores sociais do concello e da súa comarca para levar a
cabo unha cita xa consolidada “que pon en valor a cultura galega e
propicia unha convivencia intercultural entre participantes e asistentes
desenvolvendo habilidades relacionais e potenciando a carga cultlural e
turística de Ramirás.
Rosario Álvarez
Ao acto asistiu tamén a presidenta do
Consello da Cultura Galega, Rosario Álvarez, quen subliñou a forza do
traballo de Rebulir por poñer en valor a cultura de raíz, “pois sen ela
nada máis poderiamos construir”. Falou da exposición “A Galicia
Imaxinada”, que se abrirá este mediodía no marco da programación do
FIR2021 e coorganizada polo Consello da Cultura Galega. A exposición
amosa ao mundo “a acollida dos países aos que chegaron os nosos emigrantes, forxando a cultura dos sitios os que
foron sen perder o vínculo ca terra”, falando da importancia da
emigración e da imaxe que se foi consolidando de Galicia grazas ao
apousamento dos nosos emigrantes.
Sandra Quintás
Pola súa banda, a coordinadora
territorial de Cultura, Educación e Universidade da Xunta de Galicia,
Sandra Quintas, destacou o traballo incesante de Rebulir na recuperación
e manifestación da cultura galega, “poñéndoa en valor dun xeito
accesible para todo o mundo e devolvéndolle ao pobo o que é seu”. Nesta
liña, Quintas agradeceu a colaboración de entidades públicas e privadas
“para manter vivo o noso rural, escoitando a chamada da terra a prol do
mantemento da nosa cultura, con todas as trabas ás que nos estamos
enfrentando e converténdoa nunha encomenda imparable”.
Isabel Gil
A alcaldesa do Concello de Ramirás, Isabel Gil, amosou o seu orgullo
por representar “o berce do folclore nesta próxima fin de semana en
Galicia”, poñendo o seu grao de área para levar a cabo este evento “polo
que todos os veciños do concello están agradecidos, emocionados e
orgullosos un ano máis”. Gil insistiu na aplicación dos protocolos de
seguridade ante a Covid-19 e quixo pedir desculpas a todos aqueles que
este ano non poden desfrutar das actividades previstas no FIR2021 por
mor das restriccións, cos que se sinte “no compromiso de manter este
festival moitos anos máis para agradecerlles a implicación dende o seu
inicio”. Departamento de comunicación