GALICIA | SOGAMA
Sogama adxudica a construción da planta de biorresiduos de Cervo por preto de 6,4 millones
CERCEDA | Sogama
adxudicou á UTE Espina Obras Hidráulicas, S.A- Geoxa, General de
Construcciones, S.L, por un importe de 6.383.949 euros (IVE incluído), a
obra de execución e posta en marcha dunha planta de biorresiduos no
Concello de Cervo (Lugo), que formará parte da rede de infraestruturas
deseñada pola Xunta a fin de que a meirande parte dos concellos
adheridos a Sogama teñan acceso á valorización da materia orgánica e
dispoñan dunha planta de biorresiduos, ou de transferencia, a menos de
50 km de distancia.
A
instalación, que se levantará no polígono industrial de Cuíña, ocupará
unha parcela de case 8.000 m2 e dará servizo a 15 concellos do arco
cantábrico galego (a práctica totalidade dos pertencentes á comarca da
Mariña lucense, ademais de Mañón), aglutinando estes unha poboación de
máis de 69.300 habitantes. É o caso de Cervo, Alfoz, Barreiros, Burela,
Foz, Lourenzá, Mañón, Mondoñedo, Muras, Ourol, Ribadeo, O Valadouro, O
Vicedo, Viveiro e Xove.
A
planta acollerá todo o proceso de compostaxe (pretratamento,
fermentación, maduración e almacenamento), disporá de capacidade para
tratar 3.000 toneladas de materia orgánica cada ano, ás que habería que
sumar 1.600 toneladas de material estruturante (podas e restos madeira)
e producirá ao redor de 1.500 toneladas de compost que se destinará,
como fertilizante natural, ao sector da agricultura e gandería.
Así
mesmo, estará alimentada por enerxías renovables e equipada tamén con
novos e innovadores sistemas de depuración de augas e de aire, así como
de redución do nivel de ruído, garantindo con isto unha operativa
respectuosa coa contorna máis inmediata.
Infraestrutura conformada por 17 instalacións
Conforme
á lexislación europea, os concellos dispoñen de prazo ata o 31 de
decembro de 2023 para instaurar a recollida diferenciada da materia
orgánica a través do contedor marrón. Se ben se trata dunha competencia
municipal, contarán co respaldo da Xunta, que deseñou e articulou unha
rede de infraestruturas conformada por 17 instalacións: 4 plantas de
biorresiduos (unha por provincia, entrando xa en funcionamento a de
Cerceda, que actualmente dá servizo a 4 concellos) apoiadas por 13
plantas de transferencia que disporán dunha tolva específca para o
transvasamento da fracción orgánica.
A
previsión é que as instalacións integradas nesta rede, ás que se
destina un investimento de 38.600.000 euros, entren en funcionamento a
finais de 2022, propiciando que, xunto con outras plantas públicas e
privadas de compostaxe, a recollida selectiva dos residuos orgánicos
sexa unha realidade en Galicia, dando un salto importante cara ao
cumprimento dos obxectivos europeos de reciclaxe para o ano 2025. Esta
actuación conta cun cofinanciamento dos Fondos FEDER como parte da
resposta da Unión Europea á pandemia da Covid-19, toda vez que
repercute na protección do medio ambiente e, en consecuencia, nunha
maior calidade de vida. Departamento de comunicación