SERVIZOS FERROVIARIOS EN GALICIA
O BNG reclama mellorar e modernizar os servizos ferroviarios
MADRID | O deputado do BNG
no Congreso, Néstor Rego, rexistra novas iniciativas exixindo a modernización e
mellora do sistema ferroviario na Galiza. A organización frentista demanda unha
reorganización dos horarios de liñas e frecuencias entre as principais vilas e
cidades do País, así como garantir a fiabilidade do servizo e unha política
tarifaria que inclúa descontos para rematar coa discriminación que sofren as
persoas usuarias de liñas como as de Ourense-A Coruña.
O deputado do BNG volve levar máis unha vez ao Congreso o atraso que sofre
Galiza en materia ferroviaria, no que destacan as carencias tanto nas
infraestruturas como nas comunicacións diarias entre as principais cidades e
poboacións como principais eivas. A formación nacionalista lembra que a mellora
dos servizos ferroviarios é prioritaria para alcanzar os obxectivos, tanto
europeos como estatais para transformar a mobilidade con modos de transporte sustentábeis
e seguros.
“É preciso impulsar investimentos estratéxicos nas infraestruturas e
servizos ferroviarios” reivindica Rego. A liña ferroviaria do Eixo Atlántico,
Vigo- A Coruña, é unha das que experimentou maior transformación e
modernizacións nos últimos anos e converteuse nun dos traxectos de media
distancia con máis usuarios do Estado. Mais esta liña, explica Néstor Rego,
continúa tendo “importantes carencia e deficiencias que é preciso corrixir para
prestar un servizo eficiente, moderno, competitivo e atractivo”.
Para a formación nacionalista, deben solucionarse, de maneira urxente, os
problemas relacionados cos horarios. Así, segundo denunciaron as persoas
usuarias desta liña, “a oferta de servizos é insuficiente, non responde as
necesidades de mobilidade actuais. Produciuse unha diminución das frecuencias
en franxas horarias punta de entrada ao redor das 8 e de volta maioritariamente
a partir das 15.30, mais tamén con picos de demanda ás 17, 18 e 19 h, imprescindíbeis
para a mobilidade interurbana por motivos laborais e de estudos”.
No caso do traxecto Vigo-Coruña hai que ter en conta que o primeiro tren de
media distancia sae de Vigo ás 6.40 h. e ten como hora de chegada ás 8.13 h.,
aínda que realmente chega máis tarde. E os retornos son ás 15 horas, sen
relación lóxica cos horarios laborais, e ás 17 h. Tamén había un tren ás 18 h.
de luns a domingo, con todo este non ha foi reposto tras a pandemia.
En xeral, a reformulación dos horarios que entrou en vigor a partir de 21
de decembro de 2021 empeorou a situación previa, xa que está feita primando a
conexión de AVE con Madrid en detrimento das comunicacións internas entre as
cidades galegas. Por este motivo, a organización frentista demanda unha
reorganización das frecuencias e liñas para adaptalas aos horarios laborais e
estudantís.
En segundo lugar, Rego destaca os problemas relacionados coa fiabilidade do
servizo por diversas circunstancias. Os atrasos na saída de Vigo, avarías no
tren, subida e baixada de pasaxeiros... “Os trens adoitan chegar con atraso, o
que dificulta as conexións con outras liñas ou outros medios de transporte
público e supón, ás veces, ter que asumir gastos suplementarios para poder
chegar a tempo ao traballo” denuncia o deputado nacionalista.
Así mesmo, Rego sinala a necesidade de implantar unha verdadeira política
tarifaria na Galiza. As persoas usuarias denuncian a rixidez na utilización dos
abonos e demandan tarifas adaptadas que teñan en conta as circunstancias
económicas, laborais e familiares das persoas usuarias. Ademais, debe
destacarse o claro abuso polos prezos na liña da Coruña-Santiago-Ourense, “é de
máxima prioridade que se finalice coa discriminación que sofren as persoas
usuarias desta liña, unha das máis caras en relación coa distancia e condicións
do traxecto de todo o Estado” reclama Rego.
En definitiva, o BNG ve imprescindíbel “acometer a modernización e mellora
da rede e dos servizos ferroviarios, como instrumento fundamental de
vertebración territorial, cohesión social, desenvolvemento sustentábel e
conciliación entre a vida laboral e familiar”. Departamento de comunicación