GALICIA | POLÍTICA
Pontón: "Non se entende que despedir sexa igual de barato co PP que cun goberno de PSOE-Podemos"
SANTIAGO DE COMPOSTELA | O
BNG reclama ao Goberno de Pedro Sánchez que cumpra a palabra dada á cidadanía e
derrogue integramente a reforma laboral de 2012 para recuperar os dereitos
laborais “roubados” á clase traballadora polo PP, tendo en conta que existe
unha maioría no Congreso que permite liquidar esa “abrasiva” contrarreforma.
“Hai unha proposta sobre a mesa que é
claramente decepciónante porque non cumpre coa promesa que se lle fixo á
cidadanía”, destacou a portavoz nacional, Ana Pontón, para quen “non é lóxico
que sexa igual de barato despedir cun goberno do PP que cun Goberno de
PSOE-Podemos. Por iso, o BNG reclama “que esa proposta se tramite como proxecto
de lei para derrogar integramente a reforma do PP e permita recuperar dereitos
como a indemnización de 45 días por ano traballado, para que non haxa barra
libre e empresas con beneficios millonarios poidan despedir os seus
traballadores e traballadoras”, explicou.
Desde Lugo, onde acudiu para apoiar a
campaña Lugo quere tren, Pontón puxo
máis exemplos de dereitos laborais perdidos que se deben recuperar, como a
autorización administrativa dos EREs. “Lembro falando con traballadores de
VESTAS que nós explicaban que era unha pena que non se tivese derrogado a
reforma laboral de 2012, porque nese caso non sería posible que a empresa
aplicase un ERE porque precisaría da autorización da Xunta, pero coa proposta
que está facendo o Goberno central a situación queda exactamente igual”,
argumentou.
Para a líder nacionalista, o Executivo
de Pedro Sánchez ten que “escoller” se quere ou non derrogar a contrarreforma
do PP: “Non hai que baixar o listón á hora de defender os dereitos dos e das
traballadoras senón subilo, sobre todo cando hai unha maioría no Congreso para
derrogar integramente unha reforma que foi abrasiva para os seus dereitos.
Sería unha oportunidade perdida non facelo, simplemente deben pesar máis os
dereitos da clase traballadora que o interese da patronal da CEOE”, concluíu.
Pontón fixo estas declaracións en Lugo,
onde participou nunha recollida de sinaturas de apoio a campaña emprendida polo
Bloque para reivindicar conexións ferroviarias do século XXI tanto para a
cidade da muralla como para o conxunto da provincia, acto no que tamén
participou o deputado Nestor Rego.
“É unha reclamación xusta que debe ser
atendida polo Goberno do Estado tanto aquí como no conxunto do País, para
modernizar unha rede ferroviaria interior desatendida durante décadas con liñas
como a de Lugo-A Coruña que está como fai un século. Benvida a chegada do AVE,
pero a prioridade da maioría non é reducir unha hora a viaxe a Madrid, senón
poder moverse nos seus ámbitos por razóns laborais ou doutro tipo” salientou
Rego, quen avanzou que o BNG seguirá dando esa batalla no Congreso.
Pontón destacou que esta campaña “é de
toda a cidadanía que quere poñer o foco en que Lugo non pode perder o tren,
senón que ten subirse ao transporte da modernidade, que é sostible, eficiente,
o transporte de presente e de futuro”, subliñando que coller ese tren é clave
para o desenvolvemento económico e social da cidade e da provincia, “o interior
non pode seguir perdendo servizos”, sentenciou.
De feito, explicou, “cando era pequena
collía o tren para desprazarme desde Oural a Sarria e a Lugo, pero hoxe esa
estación está pechada, o servizo ferroviario cada vez é menor e non se ten
feito o esforzo necesario para que a cidadanía lucense teña un servizo do
século XXI e iso é o que reclamamos con esta campaña, coa que queremos acabar
coa discriminación que soporta Lugo nesta materia e situalo no mapa ferroviario
do futuro”.
Propostas 'Lugo quere tren'
Entre as
medidas propostas, que se cumpran os prazos nas obras de electrificación e
modernización na conexión Lugo-Ourense, modernizar a liña de conexión Lugo- A
Coruña, que está sen electrificar, acabar coa discriminación de que Lugo sexa a
única capital de provincia sen conexión directa coa capital de Galicia, bastaría
cunha obra de 27 quilómetros de vía para conectar as paradas de Curtis e Ordes
creando unha traxecto directo desde Lugo a Santiago de Compostela. E para un
tren moderno debe ofrecer horarios, frecuencias e tempos de viaxe que permitan
usalo para ir traballar, para ir estudar, para facer xestión administrativas
que se necesiten ou simplemente por ocio. Departamento de comunicación