ÁRBORE EUROPEA 2022
Valentin Formoso apoia a candidatura do Carballo de Conxo para converterse na Árbore Europea do 2022
SANTIAGO DE COMPOSTELA | O
presidente da Deputación da Coruña, Valentín González Formoso, realizou hoxe
unha visita institucional ao Concello de Santiago de Compostela que aproveitou
para achegarse ata o Carballo do Bosque do Banquete de Conxo e manifestar alí o
seu apoio á candidatura deste exemplar para converterse na Árbore Europea do 2022.
O
presidente provincial, que visitou o carballo acompañado do alcalde compostelán,
Xosé Sánchez Bugallo, e dos deputados Antonio Leira e Mila Castro, explicou que
“desde a Deputación queremos aportar o noso pequeno grao de area para que o
proxecto de Mellor Árbore sexa unha realidade”.
O
Carballo do Bosque do Banquete de Conxo conta con máis de 250 anos de historia
e, tras proclamarse como mellor árbore de España, competirá do 1 ao 28 de
febreiro con outros 15 exemplares de diferentes países europeos na última fase
do certame Árbore Europea do Ano, un concurso organizado por Bosques sen
Fronteiras coa colaboración do Ministerio de Transición Ecolóxica e Reto
Demográfico, FSC España e a Fundación Feuvert.
As
votacións para lograr que o coñecido como ‘O avó’ se impoña aos seus
competidores están habilitadas na web.
González Formoso animou “a todos os veciños e veciñas de Santiago, e tamén do
resto de municipios da provincia e de Galicia” a que “apoien esta candidatura, que
non deixa de ser unha punta de lanza dunha intención máis profunda do Concello
de Santiago”, facendo alusión á campaña ‘1 voto, 1 árbore’ que ten por
obxectivo acadar os 100.000 votos. “Isto é apostar por unha cara ecolóxica
nunha cidade que é a capital de Galicia, onde conflúe toda Europa e onde a árbore
ten que ter un protagonismo ata o punto de que o obxectivo sexa o de plantar
100.000 exemplares”, afirmou.
Xosé
Sánchez Bugallo precisou que “xa levamos máis de 3.000 árbores plantadas.
Estamos traballando activamente. O obxectivo este ano é plantar 19.000
carballos máis, que non é unha cifra pequena”. Ademais, subliñou que “é moi
importante que toda Galicia se mobilice. Isto é unha oportunidade
extraordinaria para recuperar unha parte da nosa historia, para tomar
coñecemento do enorme patrimonio que temos en materia ecolóxica”. “Desde logo,
se hai un tema no que ninguén se pode sentir marxinado, discriminado ou
agraviado é o do carballo. Todos recoñecemos que é algo extraordinario, propio
de nós”, salientou.
O
Carballo de Conxo ten unha altura de 30 metros, case 4 metros de circunferencia
de tronco e unha idade de 250 anos. Foi testemuña de acontecementos históricos
como o Banquete Democrático de Conxo, celebrado o 2 de marzo de 1856 nas súas
inmediación e no que estudantes universitarios serviron de comer e de beber a artesáns
e obreiros, seguindo os valores da Revolución Francesa de igualdade, liberdade
e fraternidade.
Reparación
da Ponte Vidán
Ademais,
Valentín González Formoso avaliou o remate das obras de reparación e
consolidación da Ponte Vidán, na aldea da Amañecida. Un proxecto que contou cun
orzamento de 447.065 euros, financiado totalmente a través do Plan Único, e que
permitiu a rehabilitación dunha infraestrutura histórica na que se detectaran
deficiencias no seu estado de conservación.
Trátase
dunha ponte estreita sobre o río Sar, moi preto da desembocadura do Sarela,
construída en pedra e formigón armado. Os traballos para a súa rehabilitación
incluíron a substitución dos muros dos estribos sobre os que se apoia a
plataforma, que tamén se cambiou. Só se conservaron os elementos de carácter histórico
da pila, da bóveda e dunha parte dos límpanos. Reconstruíuse a tallamar,
reproducindo as súas antigas dimensións grazas aos restos que se conservan.
Ademais, substituíronse as tubaxes de abastecemento de auga da zona por outra
que vai oculta na nova plataforma, ao longo das beirarrúas que se executaron.
O
presidente destacou “o investimento de preto de 10 millóns” de euros que a
Deputación levou a cabo en Santiago de Compostela nos últimos 5 anos a través
do Plan Único. Un total de 41 obras que sumaron 7 millóns de euros de
orzamento e entre as que se atopan: a da Ponte Vidán, o parque infantil de Coto
dos Olmos, o acondicionamento do centro sociocultural de Gracia, a cuberta da
pista polideportiva de Verdía, as melloras nos centros socioculturais de Grixoa
e Peregrina e os traballos no edificio multiusos de Lavacolla.
Ampliación e mellora da DP-7804 por 1 millón
Formoso
tamén anunciou a recente adxudicación das obras de ensanche, mellora do trazado
e do firme da estrada provincial DP-7804 Val do Dubra – Santiago entre os
puntos quilométricos 18+690 e 22+223, no termo municipal de Santiago de
Compostela.
As
obras foron adxudicadas por 1.013.200 euros e permitirán mellorar a seguridade
nun tramo de tres quilómetros e medio dunha vía que conta cun elevado volume de
tráfico ao conectar o núcleo compostelán de Miramontes coa intersección da
DP-0701.
Os
traballos inclúen a ampliación da plataforma da vía ata os 9 metros de ancho,
contando con 7 metros de calzada e 1 metro de beiravía en cada unha das marxes.
Tamén se mellorará o trazado en determinadas curvas e a pavimentación da
plataforma. Á súa vez, instalarase un sistema de drenaxe lonxitudinal con tubo
de formigón, recollida de pluviais nos tramos onde hai beirarrúas e dotarase á
zona de nova sinalización horizontal e vertical. Departamento de comunicación